न्यास नोंदणी कार्यालयाकडून तालुकानिहाय अधिकाऱ्यांची नियुक्ती

 

कोल्हापूर, दि. 13 (जिल्हा माहिती कार्यालय): सार्वजनिक कार्य, उत्सव करणाऱ्या संस्था, मंडळे उत्सव समित्या यांना वर्गणी परवाना सुलभरित्या मिळण्याकरिता तालुकानिहाय अधिकाऱ्यांची नियुक्ती करण्यात आली असल्याची माहिती धर्मादाय सह आयुक्त रा.ल. हेर्लेकर यांनी दिली.

             हातकणंगले, शाहूवाडी, आजरा, गडहिंग्लज, चंदगड व राधानगरी तालुक्यासाठी श्रीमती रू.र.कोरे (सहाय्यक धर्मादाय आयुक्त-1). करवीर, शिरोळ, पन्हाळा,गगनबावडा व कागल तालुक्यासाठी रा.दौ. वाबळे (सहाय्यक धर्मादाय आयुक्त-3) यांची नियुक्ती करण्यात आली आहे.

           ऑनलाईन अर्ज भरण्याची प्रक्रिया WWW.charity.maharashtra.gov.in या संकेतस्थळावर  उपलब्ध आहे.  अर्ज भरण्यासंबंधी माहिती संकेतस्थळावरील प्रणाली मार्गदर्शनमध्ये उपलब्ध आहे. अर्ज भरण्यासाठी पुढील कागदपत्रांची आवश्यकता आहे.

          अध्यक्ष व सचिव यांचे पॅनकार्ड तसेच ओळखपत्र (आधारकार्ड,निवडणूक ओळखपत्र,वाहन चालक परवाना) मागील वर्षाचे हिशोब, यावर्षाचे हिशोब आणि यावर्षाचे अंदाजपत्रक (उत्सवाचा खर्च 5 हजार पेक्षा जास्त असल्यास सनदी लेखापालांकडून तयार करून घ्यावेत.) कार्यालयामार्फत देण्यात आलेल्या परवानगरीची प्रत (मागील वर्षी परवानगी घेतली असल्यास)व या वर्षापासून नव्याने कार्य,उत्सव साजरे करीत असल्यास नगरपालिका हद्दीतील मंडळांनी त्यांचे भागातील नगरसेवकांचे (प्रथम वर्ष उत्सव साजरा करीत असल्याबाबतचे) शिफारसपत्र व ग्रामीण भागातील असल्यास संबंधित ग्रामपंचायतीचे वरील आशयाचे शिफारसपत्र जोडणे आवश्यक आहे.

          कोव्हिड -19 च्या पार्श्वभूमीवर राज्य शासन व जिल्हाधिकारी कार्यालयामार्फत वेळोवेळी जाहीर झालेल्या अटी व शर्तींचे काटेकोर पालन करण्याची हमी प्रतिज्ञापत्राव्दारे देत आहेत असे प्रमाणपत्र क्रमांक 5 इतर कागदपत्रामध्ये असणे आवश्यक आहे.

          महाराष्ट्र सार्वजनिक विश्वस्त व्यवस्था अधिनियम 1950 चे कलम 41 क अन्वये असणारी चौकशी ही न्यायीक स्वरूपाची असल्यामुळे अर्ज योग्य रीतीने करण्याची जबाबदारी अर्जदाराची आहे. न्यायीक चौकशीमधील मा.स.ध.आ. यांचे आदेश पारित झाल्यानंतरच परवानगी देण्यात येते. संबंधितांनी लवकरात-लवकर म.सा.वि.व्य.अधिनियम 1950 चे कलम 41 क नुसार तात्पुरत्या परवानगरीसाठी अर्ज दाखल करावेत.

000000