इंडिया ई च्या Dictionary मध्ये जिमाका चा ब्लॉग

Wednesday, June 20, 2018

जिल्ह्याचा 365 कोटीचा योजना आराखडा उपलब्ध निधीचे परीपूर्ण प्रस्ताव 1 ऑगस्टपूर्वी सादर करा - पालकमंत्री चंद्रकांत पाटील



पंचगंगा काठावरील गावांसाठी सांडपाणी निर्गतीची विशेष योजना
                      
              कोल्हापूर, दि. 20  :  जिल्हा वार्षिक योजनेअंर्तग्त या वर्षासाठी जिल्ह्यास 364 कोटी 83 लाखांचा आराखडा मंजूर केला असून या आराखड्यातील एकही पैसा परत जाणार नाही याची दक्षता सर्व यंत्रणांनी घ्यावी, असे निर्देश देवून पालकमंत्री चंद्रकांत पाटील म्हणाले, सर्व योजनांचे परीपूर्ण प्रस्ताव लोकप्रतिनिधी आणि सदस्यांच्या मागणी /सूचनांसह येत्या 1 ऑगस्टपूर्वी जिल्हा नियोजन समितीस सादर करावेत, या कामात कसलीही हयगय सहन केली जाणार नाही, असा इशाराही त्यांनी दिला.
        जिल्हा नियोजन समितीची बैठक पालकमंत्री चंद्रकांत पाटील यांच्या अध्यक्षतेखाली जिल्हाधिकारी कार्यालयाच्या महाराणी ताराराणी सभागृहात झाली, त्यावेळी ते बोलत होते. बैठकीस जिल्हा परिषदेच्या अध्यक्षा शौमिका महाडिक, खासदार धनंजय महाडिक, आमदार हसन मुश्रीफ, आमदार सुरेश हाळवणकर, आमदार डॉ. सुजित मिणचेकर, आमदार उल्हास पाटील, जिल्हाधिकारी अविनाश सुभेदार, महानगरपालिका आयुक्त डॉ. अभिजीत चौधरी, जिल्हा परिषदेचे मुख्य कार्यकारी अधिकारी डॉ. कुणाल खेमणार, सार्वजनिक बांधकाम विभागाचे अधिक्षक अभियंता सदाशिव साळुंखे,  जिल्हा नियोजन अधिकारी सरिता यादव, समाजकल्याण विभागाचे सहायक आयुक्त बाळासाहेब कामत यांच्यासह अनेक मान्यवर पदाधिकारी,सदस्य-सदस्या, अधिकारी उपस्थित होते.
यंदा जिल्ह्यासाठी 364 कोटी 83 लाखाचा आराखडा
              यंदा जिल्ह्यासाठी 364 कोटी 83 लाखाचा आराखडा मंजूर केला असून यामध्ये सर्वसाधारण योजनेसाठी 263 कोटी, अनुसूचित जाती उपयोजनेसाठी 113 कोटी 41 लाख आणि ओटीएसपीसाठी 1 कोटी 90 लाखाच्या तरतूदीचा समावेश असल्याचे सांगून पालकमंत्री चंद्रकांत पाटील म्हणाले, आजअखेर शासनाकडून 273 कोटी 12 लाखाचा निधी प्राप्त झाला असून या निधीच्या खर्चाचे सुक्ष्म नियोजन करावे. हे करताना लोकप्रतिनिधी आणि सदस्यांना विश्वासात घेवून त्यांच्या मागणीचा यामध्ये समावेश करावा. जिल्हा वार्षिक योजनेअंतर्गत उपलब्ध निधी 100 टक्के खर्च करण्याच्या दृष्टिने सर्व खातेप्रमुखांची दरमहा विशेष बैठक घेण्याचा निर्णयही यावेळी त्यांनी जाहीर केला. तसेच जिल्हा नियोजन समितीमार्फत विविध योजनांतर्गत केलेल्या विकास कामांचे त्रयस्थ संस्थेमार्फत तपासणी करून मुल्यांकण करण्याची सूचनाही त्यांनी यावेळी केली.
गेल्यावर्षी अनुसूचित जाती योजनेचा 100 टक्के खर्च : जिल्हा राज्यात प्रथम
              जिल्ह्यात गेल्या वर्षी  जिल्हा वार्षिक योजनेअंतर्गत मार्चअखेर 364 कोटी 83 लाखाचा खर्च करण्यात आला असून हा खर्च उपलब्ध निधीच्या 99.03 टक्के आहे. यामध्ये अनुसूचित जाती योजनेअंतर्गत 100 टक्के खर्च करून कोल्हापूर जिल्हा राज्यात प्रथम आल्याचेही पालकमंत्री चंद्रकांत पाटील यांनी  यावेळी सांगितले. यामध्ये  जिल्हा सर्वसाधारण योजनेअंतर्गत 249 कोटी 52 लाख, अनुसूचित जाती योजनेअंतर्गत 113 कोटी 41 लाख  तर ओटीएसपी अंतर्गत 1 कोटी 90 लाख रुपये खर्च करण्यात आल्याचेही त्यांनी सांगितले.
पंचगंगा काठावरील गावांसाठी सांडपाणी निर्गतीची विशेष योजना
              पंचगंगा नदी प्रदूषण रोखण्यासाठी शासनाचे सर्वोच्च प्राधान्य असल्याचे सांगून पालकमंत्री चंद्रकांत पाटील म्हणाले, पंचगंगा नदी काठावरील जिल्ह्यातील गावांसाठी सांडपाणी निर्गतीच्या दृष्टिने 4-5 गावांचे एक क्लस्टर तयार करून विशेष योजना हाती घेतली जाईल. याबरोबरच पंचगंगा नदी काठावरील सर्वच गावांना पिण्याचे शुध्द पाणी उपलब्ध करून देण्याच्या दृष्टिने आरओ सिस्टिम हाती घेतला जाईल. यासाठी इतर योजना तसेच सीएसआरमधून निधी उपलब्ध करून दिला जाईल. तसेच नगरोत्थानमधून नगरपालिकांना दिला जाणाऱ्या निधीच्या खर्चाचे उपयोगिता प्रमाणपत्र देणे संबधित नगरपरिषदांना बंधनकारक केले आहे. याशिवाय निधी उपलब्ध होणार नसल्याचेही यावेळी स्पष्ट करण्यात आले.
निमंत्रित सदस्यांनाही या वर्षीपासून निधी
              जिल्हा नियोजन समितीतील जिल्हा परिषद सदस्यांना दिल्या जाणाऱ्या निधीच्या धर्तीवर निमंत्रित सदस्यांनाही या वर्षीपासून निधी उपलबध करून दिला जाईल, अशी घोषणा करून पालकमंत्री चंद्रकांत पाटील म्हणाले, गेल्यावर्षी साकव उभारणीसाठी 33 कोटी रूपये उपलबध करून दिले असून सार्वजनिक बांधकाम विभागाने ही साकवांची कामे पूर्ण करण्याची सूचनाही त्यांनी केली. रंकाळा तलाव तसेच पंचगंगा  नदीमध्ये निर्माण झालेली जलपर्णी काढण्यासाठी महापालिकेला मशिन उपलब्ध करून दिले जाईल, यासाठी महापालिकेने प्रस्ताव तात्काळ द्यावा.  रंकाळ्यातील जलपर्णी काढल्यानंतर पंचगंगा नदीवरील जलपर्णी प्राधान्याने काढावी याकामी पाटबंधारे विभागाने पुढाकार घ्यावा,अशी सूचनाही पालकमंत्री चंद्रकांत पाटील यांनी दिली.
रस्त्यांचे  खड्डे भरण्यात पुढील वर्षी 20 कोटीची तरतूद
              अतिवृष्टीमुळे खराब झालेल्या रस्त्यांच्या दुरूस्तीसाठी जिल्हा परिषदेला गेल्या वर्षी 12 कोटी 50 लाखांचा निधी उपलब्ध करून दिला होता. या निधीतून ग्रामीण भागातील 1200  कि.मी. लांबीच्या रस्त्यांचे  खड्डे भरण्यात येणार आहेत.  या कामाची निविदा प्रकीया, वर्क ऑडर्स या बाबी तात्काळ पूर्ण करून पावसाळ्यानंतर ही कामे तात्काळ हाती घेण्याची सूचना पालकमंत्री चंद्रकांत पाटील यांनी केली. पुढील वर्षी या कामांसाठी 20 कोटीपर्यत तरतूद केली जाईल, अशी घोषणाही त्यांनी या बैठकीत केली. रस्त्याची कामे अधिक दर्जेदार करण्याची सूचनाही त्यांनी केल्या. याबरोबरच जिल्हा परिषदेकडील पाणीपुरवठा योजना प्राधान्याने पूर्ण करून जनतेला पिण्याचे शुध्द पाणी उपलबध्‍ करून देण्यास प्राधान्य राहील, या कामांचे योग्य नियोजन आणि प्रस्ताव सादर करण्याची सूचनाही त्यांनी यावेळी केली.
जलयुक्त शिवार अंतर्गत 80 गावांची निवड : अन्य गावांत लोकसहभागातून कामे
              जलयुक्त शिवार अभियानातून गावागावात शाश्वत जलसाठे निर्माण करण्याचा शासनाचा प्रयत्न असल्याचे सांगून पालकमंत्री चंद्रकांत पाटील म्हणाले, जिल्ह्यात यावर्षी जलयुक्त शिवार अभियानांतर्गत 80 गावांची निवड केली आहे. या योजनेत न बसलेली मात्र जलयुक्त शिवारची कामे घेणे आवश्यक आहे, अशा गावांमध्ये गावकऱ्यांनी पुढाकार घेवून गावातील तलाव तसेच गाळ काढणे आदी जलसंधारणाच्या प्रणालीचा गावनिहाय आराखडा तयार करावा, यासाठी लोकसहभाग आणि सीएसआरच्या माध्यमातून निधी उपलब्ध करुन दिला जाईल, अशी ग्वाही त्यांनी दिली.  गावाला लागणारी वीज सौरऊजा प्रकल्पाद्वारे निर्माण करुन गावाची वीजेची गरज पूर्ण करण्यासाठी सौर उर्जा प्रकल्प हाती घेण्यात येणार आहे. मात्र यासाठी गावाने 5 एकर जागा उपलब्ध करुन दिल्यास असे प्रकल्प राबविणे सोईचे होणार आहे. 
              आडवाटेवरचं कोल्हापूर या उपक्रमाच्या यशस्वीतेनंतर आता जिल्ह्यातील 4 धार्मिक तीर्थक्षेत्रे लोकांना पाहण्यास उपलब्ध व्हावीत, यासाठी येत्या श्रावण महिन्यात आठवड्यातून एक अशा सहलींचे आयोजन केले जाईल. या उपक्रमाचा जिल्हावासियांनी लाभ घ्यावा, असे आवाहन करुन पालकमंत्री चंद्रकांत पाटील म्हणाले,  यावर्षीच्या आपल्या वाढदिवसाचे औचित्य साधून जिल्ह्यात महिलांसाठी स्वच्छतागृहे उभारण्याचा उपक्रम हाती घेतला आहे. यापुढील काळात जिल्ह्यात जेथे जेथे महिलांसाठी स्वच्छतागृह उभारण्याची गरज आहे, तिथे- तिथे संबंधितांनी तयारी दर्शविल्यास शौचालयाची उभारणी मोफत करुन दिली जाईल, मात्र यासाठी स्वच्छतेची आणि देखभालीची जबाबदारी स्विकारणे गरजेचे आहे.
 डॉ. आंबेडकर सामाजिक विकास योजनेंतर्गत विधानसभा मतदार संघासाठी 1 कोटीचा निधी
              भारतरत्न डॉ. बाबासाहेब आंबेडकरांच्या 125 व्या जयंतीचे औचित्य साधून शासनाने राज्यात भारतरत्न डॉ. बाबासाहेब आंबेडकर सामाजिक विकास योजना जाहीर करुन या योजनेंतर्गत दलितवस्ती विकासासाठी 300 कोटीचा निधी उपलब्ध करुन देण्याचा निर्णय घेतला आहे.  या योजनेंतर्गत प्रत्येक विधानसभा मतदार संघासाठी 1 कोटीचा निधी दलित वस्ती विकासासाठी उपलब्ध होणार असून त्यानुसार जिल्ह्यातील आमदारांनी आपली कामे सुचवावीत, असे पालकमंत्री चंद्रकांत पाटील यांनी सांगितले.  
डेंग्यूचा प्रतिबंध करण्यासाठी प्रभावी उपाययोजना करा-पालकमंत्री
              जिल्ह्यात डेंग्यूचा फैलाव रोखण्यासाठी आरोग्य विभागाने डेंग्यू प्रतिबंधासाठी विशेषत: डास निर्मुलनासाठी प्रभावी उपाययोजना करावी, अशी सूचना पालकमंत्री चंद्रकांत पाटील यांनी यावेळी केली. डेंग्यू प्रतिबंधक उपाय योजनांची माहिती जनतेपर्यंत प्रभावीपणे पोहोचविण्यासाठी जनजागृतीचा आणि प्रबोधनाचा भरीव कार्यक्रम हाती घ्या, यासाठी जिल्हा नियोजन समितीच्या नाविन्यपूर्ण योजनेतून निधी उपलब्ध करुन दिला जाईल, अशी घोषणाही त्यांनी यावेळी केली. जिल्हा परिषदेने हाती घेतलेली  ‘ एकात्मिक डास निर्मुलन’ मोहिम डास निर्मुलनासाठी उपयुक्त ठरणार असून ही मोहिम सर्व यंत्रणांच्या सक्रिय सहभागातून आणि लोक सहभागातून यशस्वी करण्याचे आवाहनही त्यांनी केले. यावेळी जिल्हा परिषदेच्या माध्यमातून डास निर्मुलनासाठी राबविण्यात येणाऱ्या मोहिमेची माहिती मुख्य कार्यकारी अधिकारी डॉ. कुणाल खेमणार यांनी पॉवर पाँईंट प्रेझेंटेशनद्वारे उपस्थितांना दिली.
              याबैठकीत खासदार धनंजय महाडिक यांना दुसऱ्यांदा संसदरत्न पुरस्कार मिळाल्यबद्दल आणि पुढारीचे व्यवस्थापकीय संपादक डॉ. योगेश जाधव यांची राज्य शासनाने उर्वरित महाराष्ट्र विकास महामंडळाच्या अध्यक्षपदी निवड केल्याबद्दल या मान्यवरांच्या अभिनंदनाचे ठराव जिल्हा नियोजन समितीच्या बैठकीत एकमताने मंजूर करण्यात आले. या प्रसंगी जिल्हा नियोजन समितीच्यावतीने तयार करण्यात आलेल्या माहिती पुस्तिकेचे प्रकाशन पालकमंत्री चंद्रकांत पाटील यांच्याहस्ते करण्यात आले.
              या बैठकीत कृषी, पाणीपुरवठा, ऊर्जा, रस्ते, आरोग्य, शिक्षण, अनुसूचित जाती घटकांसाठीच्या योजना आदी विषयांबाबत सविस्तरपणे चर्चा करण्यात आली. 
00000

Tuesday, June 19, 2018





डेंग्यू प्रतिबंधासाठी गुरूवार डास संहारक दिन
जिल्ह्यात डास निर्मूलन मोहिम युध्दपातळीवर राबवा
                                            - अध्यक्षा शौमिका महाडिक
कोल्हापूर, दि. 19 :  जिल्ह्यात डेंग्यूच्या प्रतिबंधासाठी दर गुरूवार हा डास संहारक दिन पाळून गाव, गल्ली स्वच्छ करणे तसेच डासोत्पत्ती स्थाने नष्ट करण्याबरोबरच  गुरूवार कोरडा दिवस पाळून आरोग्य अधिकारी आणि कर्मचाऱ्यांनी डास निर्मूलन मोहिम युध्दपातळीवर राबवा, अशी सूचना जिल्हा परिषद अध्यक्षा शौमिका महाडिक यांनी आज येथे बोलताना केली.
            जिल्हा परिषद आरोग्य विभागाच्या वतीने आजपासून राबविण्यात येणाऱ्या ‘ एकात्मिक डास निर्मुलन’ मोहिमेचा शुभारंभ अध्यक्षा शौमिका महाडिक यांच्या हस्ते करण्यात आला. त्यावेळी त्या बोलत होत्या. जिल्हा परिषदेच्या समिती सभागृहात आयोजित केलेल्या जिल्ह्यातील आरोग्य अधिकारी आणि कर्मचाऱ्यांच्या कार्यशाळेस मुख्य कार्यकारी अधिकारी डॉ. कुणाल खेमणार,आरोग्य सभापती सर्जेराव पाटील,  जिल्हा आरोग्य अधिकारी डॉ. योगेश साळे, डॉ. मनिषा कुंभार,जिल्हा परिषद सदस्य प्रसाद खोबरे आदी मान्यवर उपस्थित होते.
            जिल्ह्यात डेंग्यूचा प्रादूर्भाव डोळ्यासमोर ठेवून जिल्हा परिषद डेंग्यू प्रतिबंधासाठी गाव घटक धरून नियोजन केले असल्याचे सांगून, अध्यक्षा शौमिका महाडिक म्हणाल्या, गाव पातळीवर डेंग्यू प्रतिबंधासाठी समिती स्थापन केली असून गावातील सर्व शासकीय, निमशासकीय कर्मचारी आणि  गावकऱ्यांच्या सक्रिय योगदानातून डास प्रतिबंधक मोहिम अधिक तीव्र केली जात आहे. यामध्ये गाव, गल्ली, गटारी, डासोत्पत्तीची स्थाने  स्वच्छ करण्याबरोबरच तुंबलेल्या गटारी वाहत्या करणे, शौचालयाच्या व्हॅट पाईपला जाळी बसवून गावातील दलदलीची ठिकाणे स्वच्छ करणे, गावाला पाणीपुरवठा करणाऱ्या टाकीतून तीव्रतेने पाणी सोडून गटारी स्वच्छ करणे तसेच ग्रमापंचायतीच्या सहकार्याने गप्पी मासे सोडणे, जळके ऑईल ओतणे, फॉगींग करणे या गोष्टीस प्राधान्य दिले आहे.
            जिल्ह्यात गेल्या पाच वर्षात 830 डेंग्यूची लोकांना  लागण झाली असून यामध्ये 14 जणांचा मृत्यू झाला आहे. ही बाब गंभीर असल्याचे स्पष्ट करून अध्यक्षा शौमिका महाडिक म्हणाल्या, डास प्रतिबंधासाठी जिल्हा परिषदेने हाती घेतलेल्या एकात्मिक डास निर्मुलन मोहिमेस सर्व यंत्रणांनी सक्रिय योगदान द्यावे, परस्पर समन्वय राखून ही मोहिम यशस्वी करावी. जिल्हा स्तरावर डास संव्हारक टिम कार्यान्वित केली असून या मोहिमेचा दर आठवड्याला आढावा घेवून तिला गती दिली  जाईल असेही त्या म्हणाल्या.
डासोत्पत्ती स्थानामध्ये गप्पी मासे सोडण्यावर भर -- डॉ. खेमणार
            डास निर्मुलनासाठी जिल्ह्यात डासोत्पत्ती स्थानांमध्ये गप्पी मासे सोडण्याचा प्रभावी कार्यक्रम हाती घेतला असून जिल्ह्यात आज मीतिस 420 गप्पी माशांची पैदास केंद्रे कार्यान्वित केली आहेत. यामध्ये शिरोळ तालुक्यात 65, हातकणंगले 47, करवीर 42, गगनबावडा 9, पन्हाळा 35, शाहूवाडी 38, कागल 43, राधानगरी 25, भुदरगड 24, आजरा 17, गडहिंग्लज 50 आणि चंदगड तालुक्यात 25 गप्पी मासे पैदास केंद्रे  कार्यरत आहेत. जिल्ह्यात गणना केलेली कायमस्वरूपी 1021 तर तात्पुरती 2174 डासोत्पती केंद्रे आहेत. मागील पाच वर्षात डेंग्यू, मलेरीया आणि चिकनगुनीया यांची 1452 जणांना लागण झाली असून 15 जणांचा मृत्यू झाला आहे. यासाठी डास प्रतिबंधक मोहिम अधिक गतीने राबविण्यात सर्वांनी मदत करावी असे आवाहनही त्यांनी केले.
            डास निर्मुलनासाठी जिल्ह्यात जिल्हा, तालुका आणि गावनिहाय उपाययोजनांचा आणि आरोग्य शिक्षणाचा आराखडा तयार केला असल्याचे सांगून मुख्य कार्यकारी अधिकारी डॉ. कुणाल खेमणार म्हणाले, डास निर्मुलनासाठी गुरूवार हा डास संहारक दिन घोषित केला आहे. गुरूवारी गाव ते जिल्हा सर्वत्र समान मोहिम हाती घेतील जाईल. यामध्ये तात्पुरती डासोत्पत्ती स्थाने नष्ट करणे, डासोत्पत्ती स्थानात गप्पी मासे सोडणे, न वापरात येणाऱ्या पाणीसाठ्यावर जळके ऑईल व डिझेल सोडणे, पिण्यासाठी वापरात न येणारे पाणीसाठी, बांधकामासाठीचे  पाणीसाठे टॉमीफॉसचा वापर करणे आणि गावा-गावात फॉगींग धूर फवारणीचा कार्यक्रम युध्द पातळीवर हाती घेतला आहे.         
            " डंख छोटा धोका मोठा " या  घोषवाक्यानुसार डास निर्मुलनाचे काम एक मोहिम म्हणून हाती घेतले  असून यंत्रणेबरोबरच जनतेनेही या मोहिमेत सहभागी होवून ही मोहिम सामूहिक प्रयत्नाव्दारे यशस्वी करावी, असे आवाहन करून मुख्य कार्यकारी अधिकारी डॉ. कुणाल खेमणार म्हणाले, जून ते ऑक्टोबर हा कालावधी डासांचा प्रजनन काळ असल्याने डासोत्पत्ती स्थाने नष्ट करण्यावर भर दिला आहे. यासाठी  गप्पी मास्यांची पुरेश्या उपलब्धता करण्यात आली आहे. महानगरपालिका, नगरपालिका आणि ग्रामीण भागात योग्य समन्वय  ठेवून ही मोहिम गतीमान केली जाईल. दर आठवड्याला या मोहिमेचा अहवाल घेवून त्यावर कार्यवाही केली जाईल. सर्व अधिकारी, कर्मचाऱ्यांनी योग्य समन्वय ठेवून डास निर्मुलन मोहिम यशस्वी करावी. या कामास सर्वानीच सर्वोच्चा प्राधान्य द्यावे असे आवाहनही त्यांनी केले.
            आरोग्या सभापती सर्जेराव पाटील यावेळी बोलताना म्हणाले, डास निर्मुलनासाठी आजपासून सुरू होत असलेल्या एकात्मिक डास निर्मुलन मोहिम यशस्वी करण्यासाठी सर्वानी सहकार्य करावे. स्वच्‍छता, दक्षता याबरोबरच आरोग्य शिक्षण या बाबींना प्राधान्य  देणे गरजेचे आहे. गावातील पाण्याच्या टाक्या महिन्यातून एकदा स्वच्छ करण्याच्या सूचनाही त्यांनी यावेळी दिल्या.
            प्रारंभी जिल्हा आरोग्य अधिकारी डॉ. योगश साळे यांनी स्वागत करून प्रास्ताविकात एकात्मिक डास निर्मुलन मोहिमेची सविस्तर माहिती दिली. डासांचे प्रकार, त्यांचा जीवनचक्र कालावधी, आयुष्य मर्यादा आणि त्यांची जीवनशैली, याबरोबरच डेंग्यू आणि हिवतापाची लक्षणे आणि उपाययोजना याची माहिती दिली. आणि गावपातळीवर करावयाच्या योजना विषद केल्या. शेवटी डॉ. दातार यांनी आभार मानले. या कार्यशाळेस आरोग्य विभागाचे अधिकारी, कर्मचारी उपस्थित होते.
000000

Thursday, November 16, 2017

माध्यमांमधील विविध प्रवाह एकमेकांना पूरक - आलोक जत्राटकर




            कोल्हापूर, दि. 16 :    स्वयंनियमन, गुणवत्तापूर्ण पत्रकारिता आणि विश्वासार्हता ही आजच्या काळात माध्यमांची फार मोठी गरज आहे. काल सुसंगतता टिकवत ज्या माध्यमांनी नवं तंत्रज्ञानाचा झपाट्याने स्वीकार केला अशीच माध्यमे काळाच्या ओघात टिकून आहेत. माध्यमामध्ये एकीकडे स्पर्धा वाढत असली तरी मुद्रीत, इलेक्ट्रॉनिक व सामाजिक हे माध्यम प्रवाह एकमेकांना परस्पर पुरक ठरत आहेत, असे प्रतिपादन शिवाजी विद्यापीठाचे जनसंपर्क अधिकारी आलोक जत्राटकर यांनी केले.
            राष्ट्रीय प्रेस दिनानिमित्त विभागीय व जिल्हा माहिती कार्यालयाच्यावतीने विभागीय माहिती कार्यालय, कोल्हापूर येथे 'माध्यमासमोरील आव्हाने'  या विषयावरील कार्यक्रमाचे आयोजन केले होते. यामध्ये मार्गदर्शन करताना ते बोलत होते. कार्यक्रमाच्या अध्यक्षस्थानी माहिती उपसंचालक सतीश लळीत होते. यावेळी जिल्हा माहिती अधिकारी वर्षा पाटोळे, सहायक संचालक एस.आर.माने, विश्वास पाटील, गुरुबाळ माळी, समीर मुजावर, विजय कुंभार यांच्या अन्य मान्यवर उपस्थित होते.
            वाढत्या गतीमानतेशी जुळवून घेण्याबरोबरच गुणवत्ता, वैशिष्ट्यपूर्ण, मुल्याधिष्ठीत आशय जपणे हे आज प्रत्येक माध्यमासमोरील आव्हान असल्याचे सांगून आलोक जत्राटकर म्हणाले, प्रत्येक व्यवस्थापनासमोर बदल हा अपरिहार्य झाला आहे. सध्याच्या काळत इलेक्ट्रॉनिक माध्यमांचा पगडा वाढत असला तरी मुद्रीत माध्यमांचे महत्व अबाधित आहे. प्रत्येक टप्यावर आलेल्या आव्हानांना समर्थपणे तोंड देत मुद्रीत माध्यमे टप्याटप्याने वाढतच गेली आहेत. ज्या वर्तमानपत्रांचे जनमानसात स्थान टिकून आहे त्यामध्ये नव तंत्रज्ञानाची स्वीकारार्हता हा भाग अत्यंत महत्वाचा ठरला आहे. सध्याच्या काळात साखळी वर्तमान पत्रे मोठ्या संख्येने वाढत आहेत त्याचा फायदा वाचक, जाहिरातदार या साऱ्यांच होत आहे. पण त्याचवेळी गुणवत्तापूर्ण वार्तामुल्यासाठी उत्तम विश्लेषण क्षमता असणाऱ्या माध्यमांची नितांत गरज निर्माण झाली आहे.  शब्दमर्यादांमुळे व्यक्त होण्यांवरही मर्यादा येत आहेत. अनेक प्रकारची कामे हाताळू शकणाऱ्या मनुष्यबळाची माध्यम जगताला गरज असून सोशल मिडिया हे फार मोठे व्यासपीठ म्हणून उदयाला येत आहे. यातून माहितीचा प्रस्फोट होत असतानाच अत्यंत संवेदनशील असणारे हे माध्यम कसे हाताळावे याबाबतचे ज्ञान देणे आवश्यक आहे.
            गतीमानता हा आजच्या जीवनाचा स्थायीभाव असला तरी माणसाच्या जीवनाची सुरुवात आणि शेवट हा माध्यमांच्या गराड्यातच होणे ही माध्यमांची ताकद असल्याचे सांगून माहिती उपसंचालक सतीश लळीत म्हणाले, सशक्त लोकशाहीसाठी समर्थ माध्यमांचे महत्व फार मोठे आहे. वृत्तपत्रांची आर्थिक उतरंड सध्याच्या काळात महत्वाची ठरत असून अशावेळी लहान, जिल्हा वर्तमान पत्रांना टिकून राहण्यासाठी आधार देणे हे शासनाबरोबरच वाचकाचे कर्तव्य आहे. माध्यमे ही सरकारला दिशा देण्याचे, लोकमत अधोरेखित करण्याचे महत्वाचे काम करीत असतात त्यामुळे चांगल्या लोकशाहीसाठी वर्तमानपत्राचे अस्तित्व महत्वाचे आहे.
            इलेक्ट्रॉनिक माध्यमांच्या तुलनेत मुद्रीत माध्यमांनी आपली विश्वासहर्याता मोठ्या प्रमाणात जपली आहे, असे सांगून सतीश लळीत म्हणाले सध्याचा सोशल मिडिया हा मोठ्या चर्चेचा विषय आहे. या माध्यमाने गांभिर्य आणि विश्वासार्हता जपली नाही तर ते फार मोठी झेप घेवू शकणार नाही. अत्यंत चांगले व्यासपीठ असूनही अनेकदा निष्काळजीपणे हाताळल्याने अनेक गंभीर प्रसंग निर्माण होवू शकतात.
            कार्यक्रमाचे प्रस्ताविक जिल्हा माहिती अधिकारी वर्षा पाटोळे यांनी केले. सूत्रसंचालन सहायक संचालक एस.आर.माने यांनी केले.

         000000

Saturday, November 11, 2017

गरिबी दूर करण्यासाठी विविध घटकांनी एकत्र यावे - पालकमंत्री चंद्रकांत पाटील



कोल्हापूर, दि. 11 : समाजातील दुर्बल घटक सक्षम होवून गरिबी दूर व्हावी यासाठी विविधस्तरातील  घटकांनी निरपेक्ष भावनेने एकत्र येवून प्रयत्न करणे आवश्यक आहे. सर्वसामान्य, गरीब कुटुंबाला हक्काचे घर मिळावे यासाठी कोल्हापूर शहरानजिक मोठी निवासी वसाहत लवकरच उभी करण्यासाठी प्रयत्नशिल असून या प्रकल्पाचे अध्यक्ष म्हणून सी.ए. शरद सामंत या निष्कलंक, चारित्र्यवान व्यक्तीमत्वाने काम पहावे, अशी इच्छा पालकमंत्री चंद्रकांत पाटील यांनी व्यक्त केली.
दि महाराष्ट्र इन्स्टिट्युट ऑफ रिसर्च ॲन्ड डेव्हलपमेंट या विश्वस्थ संस्थेच्या सामंत परिवार समाज सेवा निधीतर्फे सी.ए. शरद सामंत शैक्षणिक पुरस्कारांचे सुमारे 40 दिव्यांग, मतिमंद, अनाथ, ग्रामीण विद्यार्थी, विद्यार्थींनीना 2 लाखांच्या शैक्षणिक शिष्यवृत्तीचे वितरण पालकमंत्री चंद्रकांत पाटील यांच्याहस्ते करण्यात आले. यावेळी आयोजित समारंभात ते बोलत होते. कार्यक्रमाच्या अध्यक्षस्थानी छत्रपती शाहू इन्सिटट्यूट (सायबर) चे अध्यक्ष डॉ. रणजितसिंह शिंदे होते. यावेळी संस्थेचे नुतन अध्यक्ष सी.ए. गिरीष सामंत, शिवसेना जिल्हा प्रमुख संजय पवार, अरुण नरके, बाळ पाटणकर यांच्यासह विविध मान्यवर उपस्थित होते.
सी.ए. शरद सामंत हे निष्कलंक आणि चारित्र्यवान व्यक्तीमत्व असून त्यांच्या मार्गदर्शनाची समाजाला गरज आहे असे सांगून पालकमंत्री चंद्रकांत पाटील म्हणाले, सामाजातल्या दुर्बल घटकांना मदत करण्याचे  शरद सामंत यांचे काम आदर्शवत आहे. समाजातल्या विविधस्तरातील घटकांनी गरिबी दूर करण्यासाठी निरपेक्ष भावनेने एकत्र येणे व त्यासाठी टार्गेट ओरिएंटेड काम करणे आवश्यक आहे. कोल्हापूर शहराच्या जवळपास सर्व सामान्य माणसाला स्वत:चे हक्काचे घर उपलब्ध व्हावे यासाठी मोठी निवासी वसाहत उभी करण्यासाठी आपण प्रयत्नशिल असून त्यामध्ये शरद सामंत यांनी अध्यक्ष म्हणून काम करावे अशी इच्छाही त्यांनी यावेळी व्यक्त केली. दि महाराष्ट्र इन्स्टिट्युट ऑफ रिसर्च ॲन्ड डेव्हलपमेंट या संस्थेच्या इमारतीसाठी जागेचा प्रश्नही लवकरच मार्गी लावू असेही त्यांनी यावेळी सांगितले. यावेळी पालकमंत्री चंद्रकांत पाटील यांच्याहस्ते शरद सामंत यांचा सपत्नीक सत्कार झाला.
कार्यक्रमाचे अध्यक्ष डॉ. रणजितसिंह शिंदे यांनी शरद सामंत यांचे मार्गदर्शन सदैव महत्वाचे असल्याचे सांगून त्यांच्या प्रदिर्घ सामाजिक कार्याचा गौरव केला.
शरद सामंत यांनी सामाजिक संस्थांमध्ये वर्षानुवर्षे कार्यरत ज्येष्ठांनी स्वत: बाजूला होवून तरुण, उत्साही कार्य करणाऱ्यांचा मार्ग मोकळा करुन देणे आवश्यक असल्याचे सांगितले. यावेळी त्यानी संस्थेच्या इमारतीसाठी 35 लाख  रुपयांची तरतुद करण्यात आल्याचे सांगून आपल्या 66 व्या वाढदिवसानिमित्त मातृ संस्थेस 66 हजारांची देणगी दिली.
यावेळी चेतना विकास संस्थेच्या विद्यार्थ्यांनी स्वागत गीत सादर केले. सी.ए. गिरीष सामंत यांनी स्वागत व प्रास्ताविक केले. चेतना संगीत शास्त्र विभागासाठी 40 हजार रुपयाचा निधी देण्यात आला तर हेल्पर्स ऑफ दि हँडीकॅप्ड संस्थेचे 10, अवनी संस्थेचे 5, सायबरचे 6, बाल संकुलातील 10 यांच्यासह अत्यंत दुर्बल घटकातील विद्यार्थी, विद्यार्थींना शैक्षणिक प्राविण्य व गुणवत्ता यासाठी प्रोत्सहानात्मक पुरस्कार देण्यात आले. यावेळी कोल्हापूर शहरातील सामाजिक क्षेत्रातील विविध नामवंत उपस्थित होते.

000000

अद्ययावत क्रीडा संकुल लवकरच सुरु होणार - पालकमंत्री चंद्रकांत पाटील


·         शुटींग रेंज साहित्य लवकरच उपलब्ध होणार
·         जलतरण तलावाचा प्रश्नही मार्गी लागणार

 कोल्हापूर, दि. 11 : शुटींग रेंज व जलतरण तलाव वगळता अन्य क्रीडा प्रकारांची क्रीडांगणे तयार आहेत त्यांच्या वापरासाठी विविध क्रीडा संस्थांशी समन्वय साधून ती खेळाडूंना वापरण्यास द्यावीत.  त्यामुळे तेथे खेळाडूंचा वावर वाढून क्रीडांगणांचा वापर सुरु होईल, असे सांगून खेळाडूंसाठी विभागीय क्रीडा संकुलाच्या रुपाने अद्ययावत क्रीडा संकुल लवकरच सुरु होईल, असे प्रतिपादन पालकमंत्री चंद्रकांत पाटील यांनी केले.
विभागीय क्रीडा संकुल समितीची बैठक पालकमंत्री चंद्रकांत पाटील यांच्या अध्यक्षतेखाली झाली. यावेळी विभागीय आयुक्त चंद्रकांत दळवी, जिल्हाधिकारी अविनाश सुभेदार, जिल्हा परिषदेचे मुख्य कार्यकारी अधिकारी        डॉ. कुणाल खेमणार, महानगरपालिकेचे आयुक्त डॉ. अभिजित चौधरी, सार्वजनिक बांधकाम विभागाचे कार्यकारी अभियंता आर.एस.पाटील, क्रीडा उपसंचालक अनिल चोरमले, केएसडीआयचे सुजय पित्रे यांची प्रमुख उपस्थिती होती.
क्रीडा क्षेत्रात अधिक गुंतवणूक केल्यास अनेक गुणवंत खेळाडू उदयास येतील व ते राष्ट्रीय, अंतरराष्ट्रीयस्तरावर गौरवशील कामगिरी करतील असे सांगून पालकमंत्री चंद्रकांत पाटील यांनी कोल्हापूर येथे उभारण्यात आलेल्या विभागीय क्रीडा संकुलातील शुटींग रेंज व जलतरण तलाव वगळता सर्व क्रीडांगणांची कामे पूर्ण झाली आहेत त्यांच्या वापर होणे आवश्यक असून त्यासाठी क्रीडा संस्थांमार्फत या क्रीडागणांचा वापर खेळाडूंसाठी व्हावा. जस जशी या ठिकाणी खेळाडूंची संख्या वाढेल तसे काही त्रुटी समोर आल्यास त्या त्रुटीही दुर करणे सोईचे होईल, असे सांगितले.
तसेच कोल्हापूर स्पोर्टस डेव्हलपेंट इनिशिएटीव्ह (केएसडीआय) या संस्थेने जलतरण तलावातील पाण्याचा निचरा करुन तज्ञांकडून मत घ्यावे व हा प्रश्न कायम स्वरुपी सोडविण्यासाठी प्रोजेक्ट रिपोर्ट तयार करुन सादर करावा. त्यावर शासकीय समितीने त्यांच्या निर्णय घ्यावा व तद्नंतरच जलतरण तलावाचे पुढील काम करावे असे सांगून पालकमंत्री चंद्रकांत पाटील यांनी खेळाडूंसाठी अडथळा ठरत असल्यास रनिंग ट्रॅकवर फिरण्यास बंदी घालावी, असेही सांगितले. महानगरपालिकेने दुधाळी शुटींग रेंजचा प्रस्ताव सादर करावा अशा सूचनाही त्यांनी यावेळी दिल्या.
विभागीय आयुक्त चंद्रकांत दळवी म्हणाले, 10 मीटर शुटींग रेंज लवकरात लवकर कार्यान्वित होणे आवश्यक असून यासाठी शुटींग साहित्य खरेदीबाबत नियुक्त केलेल्या तंज्ञसमितीतील तेजस्वीन सावंत, राही सरनोबत, युवराज साळुंखे, अजित पाटील यांच्यामध्ये एकमत करुन त्यानुसार साहित्य खरेदीचा प्रस्ताव तयार करण्यात येईल व एकल पध्दतीने खरेदी होणार असल्याने तो प्रस्ताव शासनाच्या मान्यतेसाठी पाठविण्यात येईल यासाठी पुढच्या आठ दिवसात विभागीय आयुक्त पुणे यांच्याकडे तज्ञ समितीची बैठक घेण्यात येईल.  25 व 50 मीटर शुटींग रेंजचेही सर्व स्ट्रक्चर तयार असून या रेंजचाही वापर होऊ शकतो तशी मागणीही आहे. त्यामुळे या शुटींग रेंजसाठीही साहित्य खरेदीचे प्रस्ताव मार्गी लावण्यात येतील, असेही त्यांनी सांगितले. यावेळी त्यांनी मुख्य प्रवेशद्वार व स्वच्छता गृह, कंत्राटी पध्दतीने कर्मचारी नियुक्ती, पहिल्या टप्यातील निविदेतील अपूर्ण कामे आदींचा सविस्तर आढावा घेवून ही सर्व कामे 1 डिसेंबरच्या आत पूर्ण करण्याचे निर्देश दिले. तसेच पहिल्या टप्याच्या निविदाबाह्य परंतु अत्यावश्यक कामांचाही त्यांनी यावेळी आढावा घेतला.
याबैठकीत जिल्हा परिषदेचे मुख्य कार्यकारी अधिकारी डॉ. कुणाल खेमणार यांनी शिंगणापूर येथील राजर्षी शाहू क्रीडा प्रशालेसाठी आवश्यक असणाऱ्या मल्टी पर्पज हॉलसाठी नाविन्यपूर्ण योजनेतून निधी उपलब्ध व्हावा अशी मागणी केली.

0 0  0 0 0 0 0 0

Friday, November 10, 2017

45 वी कोल्हापूर परिक्षेत्रिय पोलीस क्रीडा स्पर्धा महिलांमध्ये कोल्हापूर तर पुरुषांमध्ये सांगलीला सर्वसाधरण विजेतेपद महसूलमंत्री चंद्रकांत पाटील यांच्याहस्ते पारितोषिक देवून खेळाडूंचा गौरव





कोल्हापूर, दि. 10 : 45 वी कोल्हापूर परिक्षेत्रीय पोलीस क्रीडा स्पर्धा कोल्हापूर येथे  उत्साहात पार पडली या स्पर्धेत पुरुष गटामध्ये सांगली जिल्ह्याला तर महिला गटामध्ये कोल्हापूर जिल्ह्याला सर्वसाधारण विजेते पदाचा मान मिळाला. या स्पर्धेत सांगली जिल्ह्यातील संतोष विजय माळी तर कोल्हापूर जिल्ह्यातील जयश्री शिवशंकर बोरगी हे बेस्ट ॲथलेट ठरले. सोलापूर शहरच्या संघाने शिस्तबध्द संघाचा मान मिळविला. ॲथलॅटीक्स चँम्पियनशिपचा मान पुरुष गटात  सांगली जिल्ह्याने तर महिला गटात कोल्हापूर जिल्ह्याने मिळविला. या सर्वांना महसूलमंत्री चंद्रकांत पाटील यांच्याहस्ते पारितोषिक देवून गौरविण्यात आले.
यावेळी विविध विभागांतर्गत कार्यरत कर्मचारी क्रीडा क्षेत्रात दैदिप्यमान कामगिरी करतील तर अशा खेळाडूंनी अंतरराष्ट्रीयस्तरावर कांस्यपदकापर्यंतची कामगिरी केल्यास त्यांना वर्ग एक व राष्ट्रीयस्तरावरील क्रिडास्पर्धांमध्ये कांस्यपदकापर्यंतची कामगिरी केल्यास वर्ग दोनची नियुक्ती कोणत्याही लोकसेवा अथवा राज्य सेवा परीक्षांशिवाय मिळावी यासाठी निश्चितपणे प्रयत्न करु असे प्रतिपादन पालकमंत्री चंद्रकांत पाटील यांनी केले.
 45 व्या कोल्हापूर परिक्षेत्रिय पोलीस क्रीडा स्पर्धेचा समारोप समारंभ कोल्हापूर पोलीस मुख्यालयातील पोलीस क्रीडांगणावर झाला. यावेळी आयोजित कार्यक्रमात मार्गदर्शन करताना ते बोलत होते. यावेळी छत्रपती शाहू महाराज, खासदार धनंजय महाडिक, महापौर हसिना फरास, पुणे म्हाडाचे अध्यक्ष समरजितसिंह घाटगे, कोल्हापूर परिक्षेत्राचे विशेष पोलीस महानिरीक्षक विश्वास नांगरे-पाटील, आमदार अमल महाडिक, जिल्हाधिकारी अविनाश सुभेदार, पोलीस अधीक्षक संजय मोहिते, साताऱ्याचे पोलीस अधीक्षक संदीप पाटील, जिल्हा परिषदेचे मुख्य कार्यकारी अधिकारी डॉ. कुणाल खेमणार, अपर पोलीस अधीक्षक सुहेल शर्मा, पश्चिम महाराष्ट्र देवस्थान समितीचे अध्यक्ष महेश जाधव, रुस्तम ए हिंद अमल बुचडे, अविनाश धस यांची प्रमुख उपस्थिती होती.

अत्यंत उत्साहत व शिस्तबध्द झालेल्या या क्रीडा स्पर्धेमधील विजेत्या खेळाडूंचे अभिनंदन करुन कोल्हापूर परिक्षेत्रातील खेळाडूंनी राज्यस्तरावरील जनरल चॅंम्पियनशिप जिंकून राष्ट्रीयस्तरावरही उज्वल कामगिरी करावी यासाठी पालकमंत्री चंद्रकांत पाटील यांनी खेळाडूंना शुभेच्छा दिल्या. तसेच कोल्हापूर जिल्ह्याने उत्कृष्टपणे यजमानपद सांभाळल्याबद्दल पोलीस अधीक्षक संजय मोहिते यांचे अभिनंदनही केले. 

Sunday, November 5, 2017

गेल्या तीन वर्षात पोलीस दल अधिक सक्षम आणि अद्ययावत करण्यावर भर महसूलमंत्री चंद्रकांत पाटील





       कोल्हापूर, दि. 5 : राज्याचे पोलीस दल अधिक सक्षम आणि अद्ययावत करण्याबरोबरच पोलीस अधिकारी, कर्मचाऱ्यांच्या समस्या सोडविण्यासही राज्य शासनाने गेल्या तीन वर्षात सर्वाधिक भर दिला असल्याचे महाराष्ट्राचे महसूलमंत्री चंद्रकांत पाटील यांनी आज येथे सांगितले.
          स्वामी विवेकानंद शिक्षण संस्थेच्या सभागृहात निवृत्त पोलीस अधिकारी व कर्मचारी कल्याणकारी असोसिएशनच्या मेळाव्याचे उदघाटन महसूलमंत्री चंद्रकांत पाटील यांच्याहस्ते दिपप्रज्वलनाने करण्यात आले त्याप्रसंगी आयोजित समारंभात ते बोलत होते. या मेळाव्यास प्रमुख पाहुणे म्हणून खासदार संभाजीराजे छत्रपती हे उपस्थित होते. या समारंभास स्वामी विवेकानंद शिक्षण संस्थेचे अभयकुमार साळुंखे, असोसिएशनचे राज्य अध्यक्ष निवृत्त पोलीस उप महासंचालक डी.एन.जाधव, कार्याध्यक्ष तथा निवृत्त अप्पर पोलीस महासंचालक खंडेराव शिंदे, असोसिएशनचे अन्य पदाधिकारी रामराव वाघ, गुलाबराव पोळ, पी.टी.लोहार, सिताराम न्यायनिर्गुने, सुखानंद सापते आदी मान्यवर उपस्थित होते.
          पोलीस हा समाज व्यवस्थेतील महत्वाचा घटक असल्याचे सांगून महसूलमंत्री चंद्रकांत पाटील म्हणाले, पोलीस दलासाठी आवश्यक पायभुत सेवा सुविधा आणि साधन सामुग्री उपलब्ध करुन देण्याबरोबरच पोलीसांचे प्रश्न प्राधान्याने सोडविण्यास मा. मुख्यमंत्री देवेंद्र फडणवीस यांनी प्राधान्य दिले आहे. कोल्हापूर पोलीस वसाहतीतील पोलीसांच्या घरांच्या दुरुस्तीसाठी गेल्या वर्षी 10 कोटीचा निधी मंजूर करुन ही घरे अद्ययावत करण्यात आली आहेत. तसेच पोलीसांच्या मुला-मुलींसाठी स्पर्धा परीक्षा केंद्र कार्यान्वित केले आहे.
          निवृत्त पेालीस अधिकारी, कर्मचाऱ्यांच्या रास्त मागण्यांच्या सोडवणुकीसाठी लवकरच असोसिएशनच्या पदाधिकाऱ्यांची मा. मुख्यमंत्र्यांसमवेत बैठक घेवून निश्चितपणे मार्ग काढला जाईल, अशी ग्वाही महसूलमंत्री चंद्रकांत पाटील यांनी यावेळी दिली. निवृत्त पोलीसांचे घर आणि आरोग्याचा प्रश्न महत्वचा असून निवृत्त पोलीस अधिकारी, कर्मचाऱ्यांसाठी आरोग्य विमा ही योजना राबविण्याबाबत काय उपाययोजना करता येतील याबाबत पाठपुरावा करु असेही त्यांनी यावेळी स्पष्ट केले.
          पोलीस दलासाठी शासन सदैव कटिबध्द आहे मात्र पोलीस दलानेही आपल्या कार्यकर्तुत्वाने आाणि अपुलकीच्या वागणुकीने समाजात वेगळी प्रतिष्ठा निर्माण करण्याची गरज असल्याचेही महसूलमंत्री चंद्रकांत पाटील म्हणाले.
          खासदार संभाजीराजे छत्रपती याप्रंसगी बोलताना म्हणाले, निवृत्त पोलीस अधिकारी, कर्मचाऱ्यांचे प्रश्नांच्या सोडविणुकीसाठी शासनस्तरावर पाठपुरावा करु. कोल्हापुरातील शिवाजी पुलाचा प्रलंबित प्रश्न मार्गी लावण्यासाठी युध्दापातळीवर प्रयत्न सुरु असल्याचेही यावेळी स्पष्ट केले.
       असोसिएशनचे राज्य अध्यक्ष निवृत्त पोलीस उप महासंचालक डी.एन.जाधव म्हणाले, पोलीसांनी आपल्या चांगल्या वागण्यातून नवी संस्कृती निर्माण करणे गरज आहे. समाजात पोलीसा विषयी आदर आणि अपुलकी निर्माण होईल यादृष्टीने वाचन, लेखन यासह चांगल्या वागण्याची सवय जोपासावी असे आवाहन केले. निवृत्त पोलीस अधिकारी, कर्मचाऱ्यांच्या समस्या आणि प्रश्न सनदशिल मार्गाने सोडविण्याचा प्रयत्न राहील.
          प्रारंभी कोल्हापूर जिल्हा अध्यक्ष मदन चव्हाण यांनी स्वागत केले. महासचिव सुखानंद सापने यांनी प्रास्ताविक केले. याप्रसंगी सिताराम न्यायनिर्गुने, सचिन कुंभार आदींचे भाषणे झाली. शेवटी श्री. पांढरे यांनी आभार मानले. समारंभास निवृत्त पोलीस अधिकारी, कर्मचारी उपस्थित होते.

0 00 0 0 0 0 0

Thursday, October 12, 2017

शेतकऱ्यांच्या आर्थिक संपन्नतेसाठी गटशेती प्रकल्प उपयुक्त - कुलगुरु डॉ. के.पी. विश्वनाथा कृषि तंत्रज्ञान महोत्सव आणि कृषि प्रदर्शनास सुरुवात




कोल्हापूर, दि. 12 : दिवसेंदिवस कमी होत चाललेले शेतीचे क्षेत्र विचारात घेता, यापुढील काळात गटशेती प्रकल्पाद्वारे शेती करुन शेतकऱ्यांनी आर्थिक संपन्नता साधावी, असे प्रतिपादन राहुरी कृषी विद्यापीठाचे कुलगुरु डॉ. के.पी. विश्वनाथा यांनी केले.
 शासनाचा कृषी विभाग आणि कृषी महाविद्यालय यांच्या संयुक्त विद्यमाने कृषि महाविद्यालयात आयोजित केलेल्या कृषि तंत्रज्ञान महोत्सवाचे आणि कृषि प्रदर्शनाचे उद्घाटन कुलगुरु डॉ. के.पी. विश्वनाथा यांच्याहस्ते करण्यात आले. त्याप्रसंगी ते बोलत होत. समारंभास जिल्हाधिकारी अविनाश सुभेदार, राहुरी कृषी विद्यापीठाचे संचालक (विस्तार शिक्षण) डॉ. किरण कोकाटे, संचालक (संशोधन) डॉ. शरद गडाख, कृषि सहसंचालक महावीर जंगटे आदि मान्यवर उपस्थित होते.
गटशेतीसाठी किमान 20 शेतकऱ्यांनी एकत्र येवून 100 एकरावर गटशेतीच्या प्रकल्प हाती घेतल्यास शासनाकडून अनुदानही उपलब्ध होत असल्याने हा प्रयोग शेतकऱ्यांच्या जीवनात निश्चितपणे आर्थिक स्थैर्य निर्माण करु शकतो असा विश्वास व्यक्त करुन डॉ. के.पी. विश्वनाथा म्हणाले, कृषी विद्यापीठाने शेतीच्या विकासासाठी आणि शेतकऱ्यांच्या आर्थिक परिवर्तनासाठी कृषि संशोधन आणि तंत्रज्ञान विकसित केले असून या तंत्रज्ञानाचा आणि नव नव्या बियाणांच्या वानाचा शेतकऱ्यांनी विनियोग करुन शेती क्षेत्रात प्रगती साधावी.
 राज्यातील शेतकऱ्यापर्यंत कृषी विद्यापीठाचे संशोधन आणि तंत्रज्ञान पोहचवून शेतकऱ्यांचे मनोबल वाढविण्यासाठी कृषी क्षेत्रातील सर्वानीच प्रयत्न करावेत, असे आवाहन करुन कुलगुरु डॉ. के.पी. विश्वनाथा म्हणाले, महाराष्ट्रात कृषी क्षेत्रावर सर्वाधिक भर दिला असून कृषी तंत्रज्ञानाद्वारे लाभदायी शेती करण्याबरोबरच एकात्मिक पीक पध्दतीचाही शेतकऱ्यांनी अवलंब करणे गरजेचे आहे. तसेच शेतीबरोबर पशुपालन, कुक्कुटपालन, फलोत्पादन, फळप्रक्रिया असे शेतीपुरक व्यवसाय करुन आर्थिक संपन्नता साधावी.  तसेच कृषी व्यवस्थापनाचाही अवलंब करावा. यापुढील काळात आवश्यकतेनुसार पीक पध्दतीत सुधारणा करण्याचे आवाहनही त्यांनी केले. कृषी क्षेत्रात काम करणाऱ्या तसेच कृषी पदवीधारकांनी यापुढे गावात राहून गावाच्या विकासाची जबाबदारी उचलणे गरजेचे आहे. राळेगणसिध्दी व हिवरे बाजार प्रमाणेच राज्यातील अन्य गावे विकसित करण्यास कृषी पदवीधारकांनी पुढाकार घ्यावा, असे आवाहनही त्यांनी केले
राहुरी कृषी विद्यापीठाने कृषी संशोधनात लौकिक निर्माण केल्याचे सांगून कुलगुरु डॉ. के.पी. विश्वनाथा म्हणाले, कृषी विद्यापीठाने 257 विविध पिकांचे वान विकसित केले असून 3000 हून अधिक कृषी तंत्रज्ञान विकसित केले आहे. कृषी विद्यापीठाचे संशोधन आणि तंत्रज्ञान शेतकऱ्यांच्या बांधापर्यंत पोहोचावे, यासाठी कृषी तंत्रज्ञान महोत्सव आयोजित  केल्याचे ते म्हणाले. कृषी विद्यापीठांतर्गत ‍विद्यार्थ्यांनी स्वच्छ भारत अभियान राबविण्याबरोबरच किमान 5 झाडे लावून कृषी परिसर वृक्षाच्छादीत करावा, असे आवाहनही त्यांनी केले.
जिल्हाधिकारी अविनाश सुभेदार म्हणाले, शेतकऱ्यांच्या आर्थिक उन्नतीसाठी गटशेती उपयुक्त असून कृषि विद्यपीठाने विकसित केलेले कृषी तंत्रज्ञान आणि संशोधन शेतकऱ्यांपर्यंत पोहचविण्याकामी कृषी विभागाने आणि  कृषी पदवीधारकांनी सक्रिय योगदान देणे गरजेचे आहे. ऊसावरील हुमनी रोगाचा प्रादुर्भाव रोखण्यासाठी जिल्हा नियोजन समितीतून 35 लाखाचा निधी देवून कोल्हापूर येथे हुमनी किड नियंत्रण प्रयोग शाळा विकसित करण्यात आली असल्याचे त्यांनी सांगितले.  कृषी विद्यापीठाने विकसित केलेल्या विविध वानांचा शेतकऱ्यांनी लाभ घेवून अधिकाधिक शेती उत्पन्न काढावे तसेच बाजार पेठांचा कल विचारात घेवून पीक पध्दतीत सुधारणा करणे काळाची गरज असल्याचे ते म्हणाले.
 कृषी विद्यापीठाचे संशोधन संचालक डॉ. शरद गडाख म्हणाले, कृषी विद्यापीठाने विकसित केलेले संशोधन आणि तंत्रज्ञान शेतकऱ्यापर्यंत पोहचविण्यासाठी कृषी तंत्रज्ञान महोत्सवाचे आयोजन केले असून या महोत्वाचा आणि कृषी प्रदर्शनाचा कोल्हापूर तसेच नजिकच्या जिल्हयातील शेतकऱ्यांनी लाभ घ्यावा, या महोत्सवानिमित्त्‍ या परिसरात विविध पिकांच्या 45 वानांच्या प्रात्याशिकांचा अनुभव शेतकऱ्यांना घेता येईल. यामध्ये बियाणांचे वान, विविध खते, औजारे आदींचा समावेश असल्याचे त्यांनी सांगितले.
कृषी विद्यापीठाचे (विस्तार शिक्षण) संचालक डॉ. किरण कोकाटे म्हणाले, शेतकऱ्यांमध्ये आत्मविश्वास वाढविण्यासाठी विद्यापीठाने‍  विकसित केलेले संशोधन, तंत्रज्ञान शेतकऱ्यापर्यंत पोहोचविणे आवश्यक आहे. हवामानातील बदल, तमपान वाढ, अनियमित पाऊस या साऱ्यांवर मात करण्यासाठी शेतकरी प्रथम हा उपक्रम हाती घेतला असून शाश्वत शेतीच्या दृष्टीने हा उपक्रम शेतकऱ्यांसाठी उपयुक्त ठरेल, असा विश्वासही त्यांनी व्यक्त केला.
 या प्रसंगी कृषी सहसंचालक महावीर जंगटे यांनी मनोगत व्यक्त केले. कृषी महाविद्यालयाचे सहयोगी अधिष्ठाता डॉ. जी.जी.खोत यांनी स्वागत व प्रास्ताविक केले. डॉ. प्रा. तरडे यांनी आभार मानले. या समारंभास निवासी उपजिल्हाधिकारी संजय शिंदे, जिल्हा अधीक्षक कृषी अधिकारी बसवराज मास्तोळी, उपविभागीय कृषी अधिकारी सुरेश मगदुम, शेतीनिष्ठ शेतकरी संजीव माने यांच्यासह अनेक मान्यवर, कृषी संशोधक, कृषी तंत्रज्ञ, कृषी अधिकारी, शेतकरी, विद्यार्थी, विद्यार्थ्यांनी मोठ्या संख्येने उपस्थित होते.

हुमनी किड नियंत्रण प्रयोग शाळेचे शुभारंभ
ऊसावरील हुमनी रोगाचा प्रादुर्भाव रोखण्यासाठी जिल्हा नियोजन समितीतून 35 लाखाचा निधी देवून विकसित केलेल्या हुमनी किड नियंत्रण प्रयोग शाळेचा शुभारंभ कुलगुरु डॉ. के.पी. विश्वनाथा यांच्याहस्ते करण्यात आला. त्याप्रसंगी ते बोलत होत. समारंभास जिल्हाधिकारी अविनाश सुभेदार, राहुरी कृषी विद्यापीठाचे संचालक (विस्तार शिक्षण) डॉ. किरण कोकाटे, संचालक (संशोधन) डॉ. शरद गडाख, कृषि सहसंचालक महावीर जंगटे, जिल्हा अधीक्षक कृषी अधिकारी बसवराज मास्तोळी आदिजण उपस्थित होते.
कृषी प्रदर्शनास मान्यवरांची भेट
 यावेळी विविध पीकांच्या वानाचे शेती प्रात्यक्षिकांनाही मान्यवरानी भेट देवून या प्लॉटची पाहणी केली. कृषी महाविद्यालय परिसरात आयोजित केलेल्या कृषी प्रदर्शनाचे उदघाटनही मान्यवरांच्या हस्ते करण्यात आले. या प्रदर्शनामध्ये 15 हून अधिक ऊस जातीचे वान, विविध प्रकारच्या बियाणाचे वान, ट्रॅक्टर, टिलर, रोट वेटर, यांत्रिक औजारे, पिकांचे मुल्य वर्धन तंत्रज्ञान, औषधे, किटक नाशके, ब्रुशी नाशके, जैविक खते विविध प्रकारच्या ज्युस तसेच कृषी विद्यापीठाने विकसित  केलेल्या तंत्रज्ञानावर आधारीत प्रात्यक्षिके, कृषी औजारे मांडण्यात आली होती. या प्रदर्शनास शेतकरी आणि नागरीकानी भेट देवून माहिती घेतली.

0 0 0 0 0 0 0

Monday, October 9, 2017

पर्यटन विकासासाठी नियोजन समितीतून भरीव निधी श्री अंबाबाई विकासाचा 68 कोटीचा प्रस्ताव मंजुरीच्या अंतिम टप्यात -जिल्हाधिकारी अविनाश सुभेदार पर्यटन पर्व : पर्यटन जागृती व मार्गदर्शन शिबिर संपन्न




        कोल्हापूर, दि. 9 : कोल्हापुरच्या पर्यटन विकासासाठी जिल्हा नियोजन समितीमधुन भरीव निधी उपलब्ध करुन देण्यास प्राधान्य दिले जात आहे.  श्री अंबाबाई तीर्थक्षेत्र विकास आराखड्यातील 68 कोटीचा प्रस्ताव मंजुरीच्या अंतिम टप्यात असल्याची माहिती जिल्हाधिकारी अविनाश सुभेदार यांनी  दिली.
            महाराष्ट्र पर्यटन विकास महामंडळ, कोल्हापूर हॉटल मालक संघ व कोल्हापूर डिस्ट्रीक्ट कार ऑपरेटर्स असोसिएशनच्यावतीने पर्यटन पर्व कार्यक्रमांतर्गत कोल्हापूर पर्यटन जागृती व मार्गदर्शन शिबिराचे उदघाटन जिल्हाधिकारी अविनाश सुभेदार यांच्याहस्ते दिपप्रज्वलनाने करण्यात आले. येथील हॉटेल पॅवेलीयनच्या सभागृहात आयोजित केलेल्या या कार्यक्रमास शिवाजी विद्यापीठाचे निवृत्त भुगोल विभाग प्रमुख डॉ. शहाजीराव देशमुख, महाराष्ट्र पर्यटन विकास महामंडाळाचे कोल्हापूर विभाग अधिकारी दिपक हर्णे, पर्यटन सल्लागार वासिम सरकवास, कोल्हापूर हॉटल मालक संघाचे सचिव सिध्दार्थ लाटकर,  कार ऑपरेटर्स असोसिएशनचे अध्यक्ष बाळासाहेब गयावळ आदिजण उपस्थित होते.
            कोल्हापूर जिल्ह्याच्या पर्यटन व तीर्थक्षेत्र विकासाला पालकमंत्री चंद्रकांत पाटील यांच्या मार्गदर्शनाखाली जिल्हा नियोजन समितीच्या समितीतून चालना देण्यात आली असल्याचे सांगून जिल्हाधिकारी अविनाश सुभेदार म्हणाले, जिल्हा नियोजन समितीच्या माध्यमातून जिल्ह्यात तीर्थक्षेत्र व पर्यटन विकासाची अनेक कामे हाती घेतली आहेत. याबरोबरच श्री अंबाबाई मंदिरावर साडेचार कोटी रुपये खर्चुन आकर्षित विद्युत रोषणाई करण्यात आली आहे. श्री क्षेत्र जोतिबा विकास आराखड्यांतर्गत 25 कोटींना मान्यता मिळाली असून  श्री अंबाबाई विकास आराखड्यातून 68 कोटीचा प्रस्ताव अंतिम टप्यात आहे. याबरोबरच पन्हाळा येथे लाईट व साऊंड शो, शाहू जन्मस्थळाचा विकास, ऐतिहासिक माणगाव परिषद विकास आराखडा अशा अनेक पर्यटन व तीर्थक्षेत्र विकासाच्या कामांना प्राधान्य दिल्याचेही त्यांनी सांगितले.
            पर्यटन क्षेत्रात कोल्हापुरचे नाव देशाबरोबरच जगाच्या नकाशावर यावे, देशातील तसेच आंतरराष्ट्रीय पर्यटकांचे कोल्हापूर आकर्षण ठरावे, यासाठी कोल्हापूरचा आगामी 100 वर्षाच्या पर्यटन विकासाचे नियोजन करुन काम करणे आवश्यक असल्याचे सांगून जिल्हाधिकारी अविनाश सुभेदार म्हणाले, कोल्हापुरच्या पर्यटन विकासासाठी पायाभुत सुविधा निर्माण होणे गरजेचे असून यासाठी कोल्हापुरच्या जनतेने सक्रिय सहकार्य आणि मदत करण्यात पुढाकार घेणे आवश्यक आहे. यामध्ये कोल्हापूर-नागपूर चौपदरीकरण रस्ता, सातारा-कागल सहापदरी रस्ता, कोल्हापूर-वैभववाडी रेल्वे, कोल्हापुरची विमान सेवा असे अनेक प्रकल्प मार्गी लावणे गरजेचे असून यासाठी स्थानिकांनी पर्यटन विकासासाठी प्रसंगी त्याग करावा लागला तरी तो करावा, असे आवाहनही त्यांनी केले.
            कोल्हापुरला ऐतिहासिक व सांस्कृतिक वारसा लाभला असून पर्यटन क्षेत्रात कोल्हापुरची वेगळी ओळख निर्माण होत आहे. कोल्हापुरला पर्यटनाच्या दृष्टीने मोठी संधी असून या क्षेत्रात रोजगाराच्या संधी असल्याने या क्षेत्रात होणारी गुंतवणूक ही पर्यटन विकासाला चालना देणारीच ठरणार असल्याचे मत जिल्हाधिकारी अविनाश सुभेदार यांनी स्पष्ट केले. ते म्हणाले देशातील तसेच परदेशातील पर्यटकांना आकर्षित करण्यासाठी कार ऑपरेटर्ससह पर्यटन क्षेत्रातील सर्वांनीच कोल्हापूरात येणाऱ्या पर्यटकाच्या प्रती आस्था पूर्वक वागणूक पर्यटकांचे आपले पाहुणे समजून आदरातीर्थ करावे, अशी अपेक्षाही त्यांनी व्यक्त केली.
            शिवाजी विद्यापीठाचे निवृत्त भुगोल विभाग प्रमुख डॉ. शहाजीराव देशमुख म्हणाले, कोल्हापूर पर्यटन समृध्द जिल्हा असून येथील पर्यटन स्थळांची इतंभुत माहिती बाहेरुन येणाऱ्या पर्यटकांना योग्य पध्दतीने मिळणे गरजेचे आहे. पर्यटकांसाठी निवास व दळणवळणाची सुविधा महत्वाची असून याकामी अधिक लक्ष देणे आवश्यक आहे. पर्यटन विकासासाठी जोतिबा-पन्हाळा स्काय लिफ्टने जोडण्या बरोबरच विशालगड येथे आकाश पाळणा, गगनगड येथे पुष्प पठार आणि मसाई पठार येथे इको गार्डन अशा अनेकविध बाबी हाती घेणे गरजेचे असल्याचे सांगितले.
             पर्यटन सल्लागार वासिम सरकवास म्हणाले, कोल्हापुरला भेट देणाऱ्या भाविक व पर्यटकांना पाहुणे म्हणून वागणूक देण्यात कार ऑपरेटर्सनी पुढाकार घ्यावा. कोल्हापुरच्या पर्यटन स्थळाची माहिती आणि महती येथील ऐतिहासिक, सांस्कृतिक, खाद्य संस्कृती अशा सर्वच बाबींची माहिती आदरपूर्वक द्यावी. कार ऑपरेटर्स हे कोल्हापुरच्या पर्यटनाचे ब्रँड अँबॅसिटर असून पर्यटकांना आदरातीथ्याची अनुभूती मिळेल यादृष्टीने त्यांनी प्रयत्न करावेत आवाहनही त्यानी केले.
            प्रारंभी   कार ऑपरेटर्स असोसिएशनचे अध्यक्ष बाळासाहेब गयावळ यांनी स्वागत केले, कोल्हापूर हॉटल मालक संघाचे सचिव सिध्दार्थ लाटकर यांनी प्रस्ताविक केले. महाराष्ट्र पर्यटन विकास महामंडाळाचे कोल्हापूर विभाग अधिकारी दिपक हर्णे यांनी पर्यटन पर्व उपक्रमाची सविस्तर माहिती दिली.  याप्रसंगी अमरजा निंबाळकर यांनी आपले मनोगत व्यक्त केले. समारंभास हॉटेल असोसिएशनचे उपाध्यक्ष उमेश राऊत, पथीक प्रतिष्ठानच्या अरुणा देशपांडे, पल्लवी कोरगावकर, विद्या प्रबोधिनीचे अध्यक्ष राहुल चिकोडे,  अरुण चोपदार यांच्यासह अनेक मान्यवर आणि हॉटेल मालक संघ व कार ऑपरेटस असोसिएशनचे सदस्य मोठ्या संख्येने उपस्थित होते. सुत्रसंचालन समीर देशपांडे यांनी केले.

0 0 0 0 0 0 

Wednesday, September 27, 2017

स्वच्छ भारत मिशनमधील कोल्हापूर जिल्ह्याच्या कामगिरीबद्दल अभिमान -पालकमंत्री चंद्रकात पाटील


                     कोल्हापूर दि. 27 : देश स्वच्छ रहावा यासाठी पंतप्रधान नरेंद्र मोदी यांनी तीन वर्षापूर्वी स्वच्छ भारत अभियान सुरू केले. यामध्ये उत्कृष्ठ कामगिरी करणाऱ्यांना गुणांकनाच्या आधारे राष्ट्रीय स्तरावरील पारीतोषिके देऊन गौरविण्यात येत आहे. यामध्ये यावर्षी कोल्हापूर जिल्ह्याने नेत्रदिपक कामगिरी करत प्रथम क्रमांक मिळविला. जिल्ह्याचे हे यश अत्यंत अभिमानास्पद व आनंददायी आहे. अशा भावना पालकमंत्री चंद्रकांत पाटील यांनी व्यक्त केल्या.
                      2 ऑक्टोबर,2017 या महात्मा गांधी जयंती निमित्ताने केंद्र शासनाच्या पेयजल व स्वच्छता मंत्रालयामार्फत स्वच्छता दर्पण पुरस्काराचे आयोजन करण्यात आले आहे. स्वच्छ भारत मिशन अंतर्गत होणा-या कामांवर आधारित याचे गुणांकन केले गेले असून यामध्ये कोल्हापूर जिल्हा देशात प्रथम स्थानावर आहे. 2 ऑक्टोबर रोजी स्वच्छता दर्पण पुरस्काराने कोल्हापूरसह  महाराष्ट्रातील 5 तर देशातील 47 जिल्ह्यांना यावेळी पुरस्कार देऊन गौरविण्यात येणार आहे.
                      पालकमंत्री चंद्रकांत पाटील म्हणाले, स्वच्छ भारत मिशन अंतर्गत कोल्हापूर जिल्हा प्रथम स्थानी आहे. यामध्ये जिल्ह्यातील नागरिक आणि प्रशासन यांचा महत्वाचा वाटा आहे. स्वच्छता या विषयामध्ये कोल्हापूर राष्ट्रीय पातळीवर सातत्याने अधोरेखीत होत आहे. स्वच्छ भारत अभियानाच्या लोगो निर्मितीच्या स्पर्धेतही कोल्हापूरचे सुपूत्र अनंत खासबागदार यांनी निर्माण केलेला महात्मा गांधीजींचा चष्मा असणारा लोगो स्वच्छ भारत अभियानाचा लोगो म्हणून निवडला गेला आणि आता तर त्याला नोटेवरही स्थान मिळाल्याने तो प्रत्येकाच्या हातात गेला आहे. या जिल्ह्यात प्रचंड कल्पकता आणि समर्पण आहे. नकारात्मकता बाजूला ठेवून करवीर निवासीनी अंबाबाईच्या या जिल्ह्यात सर्वांनी मिळून एकत्र येवून कार्य केल्यास जिल्हा सर्वार्थाने प्रथम क्रामांकावर राहील. दरडोई उत्पन्नामध्ये देशात चंदीगड अग्रेसर आहे. कोल्हापूर गेली पाच वर्ष सातत्याने दुसऱ्या क्रमांकावर आहे. सर्वानी मिळून एकत्र येवून काम केल्यास आपण प्रथम क्रमांकावर येवू शकतो, असा विश्वासही त्यांनी यावेळी व्यक्त केला.

00000