शासकीय तंत्रनिकेतनमध्ये दिव्यांग व्यक्तींसाठी अभ्यासक्रम

 

 

कोल्हापूर, दि. 12 (जिल्हा माहिती कार्यालय): शासकीय तंत्रनिकेतनमध्ये 10 वी पास दिव्यांग विद्यार्थ्यांकरिता केंद्र शासनाच्या योजनेनुसार व्यावसायिक प्रशिक्षण वर्ग व अभियांत्रिकी पदविका अभ्यासक्रम सुरू करण्यात आला असल्याची माहिती शासकीय तंत्रनिकेतनच्या प्राचार्यानी दिली.

 व्यावसायिक प्रशिक्षण वर्गामध्ये (फक्त कोल्हापूर जिल्हा दिव्यांग व्यक्तींसाठी) कार्यालयीन सहायक (संगणकीय), मोबाईल दुरूस्ती व शिलाई काम (पुरूष/स्त्री) असे प्रशिक्षण वर्ग सुरू करण्यात येत आहेत. या प्रशिक्षणासाठी कोणत्याही प्रकारचे अपंगत्व असणाऱ्या किमान 5 प्रशिक्षणार्थींनींसाठी प्रशिक्षण वर्ग सुरू करण्यात येतील. प्रशिक्षणार्थींकडून कोणत्याही प्रकारची फी आकारली जाणार नाही. आवश्यक उपकरणे व साहत्य पुरविण्यात येईल. तसेच प्रवास भत्ता, विद्या वेतन व इतर सोयी सुविधा केंद्र शासनाच्या नियमाप्रमाणे प्रशिक्षणार्थींस देण्यात येईल.

अभियांत्रिकी पदविका अभ्यासक्रमासाठी (राज्यस्तरीय प्रवेश) स्थापत्य अभियांत्रिकी, विद्युत अभियांत्रिकी, यंत्र अभियांत्रिकी, औ. अणुविद्युत व माहिती तंत्रज्ञान या अभ्यासक्रमासाठी प्रत्येकी 5 विद्यार्थ्यांना प्रवेश देण्यात येणार आहे. प्रवेश घेतलेल्या विद्यार्थ्यांना शैक्षणिक फी माफ असून वसतिगृह, भोजन व भत्ता मोफत आहे. तसेच विद्या वेतन, पुस्तके, स्टेशनरीसाठी भत्ता अशा सोयी येथे उपलब्ध आहेत.

इच्छूक दिव्यांग विद्यार्थ्यांनी अधिक माहितीसाठी www.gpkolhapur.org.in व www.dtemaharashtra.gov.in या संकेतस्थळावर संपर्क साधावा, असे आवाहनही संस्थेच्या प्राचार्यानी केले आहे.

00000