कोल्हापूर, दि. 13 (जिमाका): दरवर्षी २६
जानेवारी, १५ ऑगस्ट या राष्ट्रीय सणादिवशी, १ मे महाराष्ट्र दिनी तसेच इतर
महत्वाच्या कार्यक्रमांच्या व क्रीडा आयोजनांच्या दिवशी लहान आकारातील कागदी व
प्लॅस्टीकच्या राष्ट्रध्वजांची विक्री होते. शालेय विद्यार्थी, लहान मुले,
व्यक्ती राष्ट्रभक्ती व उत्साहापोटी हे राष्ट्रध्वज विकत घेतात परंतू हे ध्वज
त्याच दिवशी सायंकाळी अथवा दुसऱ्या दिवशी इतरत्र टाकले जातात, त्यामुळे
राष्ट्रध्वजाचा अवमान होतो. यामुळे कागदी व प्लॅस्टिकचे राष्ट्रध्वज वापरु नयेत,
असे आवाहन निवासी उपजिल्हाधिकारी संजय तेली यांनी केले आहे.
गृह विभागाच्या शासन
निर्णयानुसार रस्त्यावर इतरत्र पडलेल्या, खराब झालेल्या व फाटलेल्या ध्वजांचे संकलन
करुन राष्ट्रध्वज संहितेमध्ये नमुद कार्यपध्दतीनुसार नष्ट करण्यासाठी ग्रामपंचायत,
नगरपरिषद व महानगरपालिका स्तरावर समित्या स्थापन करण्यात येत आहेत.
ग्रामपंचायत
स्तरावर- अध्यक्ष- ग्रामसेवक, सदस्य - १) गावातील शाळांचे मुख्याध्यापक, २) गावातील
पोलीस पाटील
(२) नगरपरिषद व नगरपंचायत स्तरावर- अध्यक्ष- मुख्याधिकारी,
सदस्य- 1) नगरातील शाळांचे मुख्याध्यापक, २) संबंधित पोलीस ठाण्याच्या वरिष्ठ पोलीस
निरीक्षक किंवा त्यांचा प्रतिनिधी
(३) महानगरपालिका स्तरावर- प्रभागनिहाय समित्या अध्यक्ष-
प्रभाग अधिकारी, सदस्य-1) प्रभागातील शाळांचे मुख्याध्यापक, २) संबंधित पोलीस
ठाण्याचे वरिष्ठ पोलीस निरीक्षक किंवा त्यांचा प्रतिनिधी याप्रमाणे समित्या स्थापन
करुन त्या कार्यान्वीत करण्यासाठी मुख्य कार्यकारी अधिकारी, आयुक्त, कोल्हापूर महानगरपालिका,
पोलीस अधीक्षक व मुख्याधिकारी, नगरपालिका यांना कळविण्यात आले आहे.
दि.
१५ ऑगस्ट २०२३ रोजी व त्यानंतर कागदी व प्लॅस्टीकचे राष्ट्रध्वज वापरु नयेत. राष्ट्रध्वज
इतरत्र टाकू नयेत. राष्ट्रध्वजाचा सन्मान करावा. तसेच सर्व नागरिक, सामाजिक संस्था,
अशासकीय संस्था यासंदर्भात नेमण्यात आलेल्या शासकीय समित्या यांनीही इतरत्र पडलेले,
खराब झालेले व फाटलेले राष्ट्रध्वज संकलित करावेत तसेच कोणत्याही संस्थेने किंवा व्यक्तीने
स्वतःहून गोळा केलेले राष्ट्रध्वज शासकीय समित्यांकडे द्यावेत. या समित्यांनी ते स्वीकारुन
खराब व फाटलेल्या राष्ट्रध्वजांची विल्हेवाट ध्वजसंहितेतील तरतुदीनुसार नेमण्यात आलेल्या
समित्यांनी करावी, असे आवाहनही निवासी उपजिल्हाधिकारी श्री. तेली यांनी केले आहे.
00000
कोणत्याही टिप्पण्‍या नाहीत:
टिप्पणी पोस्ट करा
टीप: केवळ या ब्लॉगचे सदस्य टिप्पणी पोस्ट करू शकतात.