प्रधानमंत्री पीक विमा योजनेचा शेतकऱ्यांनी लाभ घ्यावा
-खासदार राजू शेट्टी
कोल्हापूर दि. 16 u कोल्हापूर जिल्ह्यात उद्भवलेल्या पूरसदृश्य स्थितीच्या पार्श्वभूमीवर भविष्यातील नुकानास टाळण्याकरिता जिल्ह्यातील अधिकाधिक शेतकऱ्यांनी प्रधानमंत्री पिक विमा योजनेचा लाभ घेणे आवश्यक असून याकरिता संबंधित बँकेशी दि. 31 जुलै 2016 पर्यंत संपर्क साधावा. तसेच याबाबत
काही अडचण निर्माण झाल्यास
लीड बँक व कृषि विभागाशी संपर्क साधावा असे आवाहन जिल्हा दक्षता व संनियंत्रण समितीचे अध्यक्ष खा. राजू शेट्टी यांनी केले.
जिल्हाधिकारी कार्यालयातील ताराराणी सभागृहात आयोजित जिल्हा दक्षता व संनियंत्रण समितीच्या सभेत ते बोलत होते. याप्रसंगी आमदार चंद्रदीप नरके, आमदार उल्हास पाटील, आमदार प्रकाश आबिटकर, आमदार डॉ. सुजित मिणचेकर, कोल्हापूर जिल्हा परिषदेच्या अध्यक्षा विमल पाटील, जिल्हाधिकारी डॉ. अमित सैनी, मुख्य कार्यकारी अधिकारी डॉ. कुणाल खेमणार, डीआरडीचे प्रकल्प संचालक डॉ. हरिष जगताप, जिल्हा अधीक्षक कृषि अधिकारी बी. बी. मास्तोळी आदी मान्यवर उपस्थित होते.
जिल्ह्यात नुकतीच अतिवृष्टीमुळे पूरसदृश्य स्थिती उद्भवली होती. तथापि जिल्ह्यातील धरणे अजून 100 टक्के भरलेली नाहीत. त्यामुळे ही धरणे भरल्यानंतर या पावसाळ्यात पुन्हा पूरस्थिती उद्भवण्याची दाट शक्यता आहे. ही वस्तुस्थिती लक्षात घेता शेतकऱ्यांनी आपले नुकसान टाळण्याकरिता प्रधानमंत्री पिक विमा योजनेचा लाभ घ्यावा. या योजनेंतर्गत भात, ज्वारी, नाचणी, भुईमुग, सोयाबीन आदी पिकांचा समावेश करण्यात आलेला आहे. अशी माहिती यावेळी बोलताना खासदार राजू शेट्टी यांनी दिली.
जिल्हाधिकारी यांच्या आरोग्य यंत्रणेस दक्षतेची सूचना
जिल्ह्यातील पूरस्थिती कमी होत आहे. जिल्ह्यातील नद्यांच्या पाण्याची पातळी कमी होत आहे. तथापि
या पार्श्वभूमीवर जिल्ह्यात रोगराई उद्भवण्याची शक्यता आहे. त्यादृष्टीने आरोग्य विभागाने आपली यंत्रणा सज्ज ठेवावी. पावसाळ्यात सर्पदंशाच्या घटना घडतात. तसेच लेप्टो, मलेरिया, डेंगू यांसारखे आजार उद्भवतात त्यादृष्टीने पुरेसा औषधसाठा उपलब्ध ठेवावा. अशी सूचना जिल्हाधिकारी डॉ. अमित सैनी यांनी केली. तसेच बैठकीत उपस्थित केलेल्या विविध विषयांच्या अनुषंगाने दिलेल्या सूचनांची संबंधित अधिकाऱ्यांनी सात दिवसात पूर्तता करावी असे निर्देशही या बैठकीत बोलताना जिल्हाधिकारी डॉ. अमित सैनी यांनी संबंधित अधिकाऱ्यांना दिले.
कोल्हापूर जिल्हापरिषदेचे मुख्य कार्यकारी अधिकारी डॉ. कुणाल खेमणार यांनी जिल्हा परिषदेच्या आरोग्य विभागाने पुरग्रस्त भागात तपासणी सुरु केली
असून, नागरिकांना पावसाळी आजार उद्भवू नयेत याकरिता मार्गदर्शन केले जात
असल्याची माहिती सभागृहास दिली.
बैठकीत मागील सभेच्या इतिवृत्ताचे वाचन करून त्या अनुषंगाने विविध विकास कामांचा आढावा घेण्यात आला. तसेच महसूल
मंत्री म्हणून बढती मिळाल्याबाबत जिल्ह्याचे पालकमंत्री चंद्रकांत पाटील, कृषि राज्यमंत्रिपद मिळ्याल्या बद्दल आमदार सदाभाऊ खोत, उत्कृष्ठ संसदपट्टू म्हणून देशात तिसऱ्या क्रमांकाचे मानकरी ठरल्याबद्दल खा. धनंजय महाडिक, तसेच राज्यसभेवर खासदार म्हणून निवड झाल्या बद्दल खा. छ. संभाजी राजे, आदींच्या अभिनंदनाचा ठराव मांडण्यात आला.
याप्रसंगी जिल्ह्यातील पंचायत समितीचे सभापती, विविध
विभागाचे प्रमुख, जिल्हा दक्षता व संनियंत्रण समितीचे शासकीय व अशासकीय सदस्य, अधिकारी, पदाधिकारी मोठ्या संख्येने उपस्थित होते.
00000
कोणत्याही टिप्पण्‍या नाहीत:
टिप्पणी पोस्ट करा
टीप: केवळ या ब्लॉगचे सदस्य टिप्पणी पोस्ट करू शकतात.