कोल्हापूर, दि. 6
(जिमाका): मुला-मुलींच्या शासकीय वसतिगृहांमध्ये अनु.जाती,
अनु.जमाती, विजाभज, इमाव व विमाप्र प्रवर्गामधील 8 वी, 9 वी, 11 वी, 12 वी, प्रथम व
व्दितीय वर्षामध्ये तसेच अभियांत्रिकी अभ्यासक्रमासाठी मागील वर्षी थेट व्दितीय वर्षासाठी
प्रवेश घेतलेल्या व या वर्षी तृतीय वर्षामध्ये शिकत असलेल्या सन 2022-23 मधील प्रवेशित
विद्यार्थ्यांना विनामूल्य प्रवेश देण्याची प्रक्रिया सुरू आहे. गरजू विद्यार्थ्यांनी
www.apalesarkar.mahaonline.gov.in
या संकेतस्थळावर अर्ज भरून त्याची प्रत संबंधित वसतिगृहाचे अधिक्षकांकडे सादर करावी.
शालेय, विद्यालय व महाविद्यालय विद्यार्थ्यांनी 15 जुलै पर्यंत व व्यावसायिक अभ्यासक्रमासाठी
30 जुलै पर्यंत अर्ज सादर करावेत, असे आवाहन समाज कल्याण विभागाचे सहायक आयुक्त विशाल
लोंढे यांनी केले आहे.
वसतिगृहामध्ये
प्रवेशित विद्यार्थ्यांना गणवेश, शैक्षणिक साहित्य, नाष्टा, दोन वेळचे जेवण व राहण्याची
सोय, ग्रंथालय, निर्वाह भत्ता, मनोरंजन कक्ष, जिम या सोयी विनामूल्य उपलब्ध करून दिल्या
जातात.
पहिली प्रवेश निवड यादी अनुक्रमे दि.
18 जुलै व दि.5 ऑगस्ट रोजी अंतिम करण्यात येईल. पहिल्या व दुसऱ्या निवड यादीखेरीज वसतिगृहातील
प्रवेशाच्या जागा रिक्त राहिल्यास शालेय विद्यार्थी, इयत्ता 10 वी व 11 वी नंतरच्या
अभ्यासक्रमामध्ये प्रवेश घेतलेल्या विद्यार्थ्यांसाठी (व्यावसायिक अभ्यासक्रम वगळून),
पदवी, पदविका, पदव्युत्तर पदवी इत्यादी अभ्यासक्रमासाठी (व्यावसायिक अभ्यासक्रम वगळून)
दि.24 ऑगस्ट व व्यावसायिक अभ्यासक्रमासाठी 30 सप्टेंबर 2022 पर्यंत प्रथम येणाऱ्या
विद्यार्थ्यास प्राधान्य देऊन त्यास तात्काळ त्याच दिवशी वसतिगृहात प्रवेश दिला जाईल
(स्पॉट ऍ़डमिशन).
सहायक आयुक्त, समाज कल्याण, कोल्हापूर
या कार्यालयाच्या अधिनस्त जिल्ह्यामध्ये एकूण 4 शासकीय निवासी शाळा कार्यरत आहेत. शासकीय
निवासी शाळेमध्ये प्रवेशित विद्यार्थ्यांना गणवेश, शैक्षणिक साहित्य, नाष्टा, दूध,
दोन वेळेचे जेवण व राहण्याची सोय, मनोरंजन कक्ष, जिम इत्यादी प्रकारच्या सोयी विनामूल्य
उपलब्ध करून दिल्या जातात.
शासकीय निवासी शाळा प्रवेशासाठी www.apalesarkar.mahaonline.gov.in
या संकेतस्थळावर अर्ज भरून त्याची प्रत संबंधित शास़कीय निवासी शाळेचे मुख्याध्यापकांकडे
सादर करावी. इच्छुक विद्यार्थ्यांनी अधिक माहितीसाठी संबंधित वसतिगृहाचे गृहपाल / संबंधित
शासकीय निवासी शाळेचे मुख्याध्यापक आणि सहायक आयुक्त समाज कल्याण, कोल्हापूर विचारे
माळ, बाबर हॉस्पीटल जवळ, कोल्हापूर येथे समक्ष किंवा दूरध्वनी क्र.0231-2651318 याव्दारे
संपर्क साधावा, असेही श्री. लोंढे यांनी कळविले आहे.
000000
कोणत्याही टिप्पण्‍या नाहीत:
टिप्पणी पोस्ट करा
टीप: केवळ या ब्लॉगचे सदस्य टिप्पणी पोस्ट करू शकतात.