शासन आपल्या दारी: महारोजगार मेळावा व महाआरोग्य शिबिराचे उद्योग मंत्री उदय सामंत यांच्या हस्ते उद्घाटन

 

◆ मुख्यमंत्री एकनाथ शिंदे यांच्या उपस्थितीत आज 4 वाजता तपोवन मैदानात कार्यक्रम

 

कोल्हापूर, दि. 13 (जिमाका) : शासन आपल्या दारी कोल्हापूर जिल्हास्तरीय कार्यक्रमांतर्गत तपोवन मैदानात आयोजित पंडित दिनदयाल उपाध्याय महारोजगार मेळावा व महा आरोग्य शिबिराचे उद्योग मंत्री उदय सामंत यांच्या हस्ते उद्घाटन करण्यात आले. यावेळी खासदार धैर्यशील माने, जिल्हाधिकारी राहुल रेखावार, एमआयडीसी चे प्रादेशिक अधिकारी मिलिंद भिंगारे, जिल्हा उद्योग केंद्राचे महाव्यवस्थापक प्रदीप शेळके, कौशल्य विकास विभागाचे सहायक आयुक्त संजय माळी, जिल्हा शल्य चिकित्सक डॉ.देशमुख आदी उपस्थित होते.

 

    यावेळी उद्योग मंत्री उदय सामंत, राज्य नियोजन मंडळाचे कार्यकारी अध्यक्ष राजेश क्षीरसागर व खासदार धैर्यशील माने यांनी कार्यक्रमाच्या ठिकाणी व्यासपीठ व्यवस्था, उपस्थित नागरिक, लाभार्थी, पत्रकार, मान्यवरांची बैठक व्यवस्था तसेच विविध कक्षांची पाहणी करुन कार्यक्रमाच्या तयारीची माहिती घेतली. 

 

            कौशल्य, रोजगार, उद्योजकता आणि नाविन्यता विभागाच्या वतीने पंडीत दिनदयाल उपाध्याय महारोजगार मेळाव्यात 1800 हून अधिक रिक्त पदांसाठी 15 कंपन्या सहभागी झाल्या आहेत.

महा आरोग्य शिबिरात रक्तदान शिबिर व नागरिकांसाठी विविध विभागांच्या तज्ञ डॉक्टरांकडून तपासणीची व्यवस्था करण्यात आली आहे.

 

            ‘शासन आपल्या दारी’ अभियानांतर्गत जिल्हास्तरीय कार्यक्रम आज मंगळवारी सायंकाळी 4 वाजता मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्या उपस्थितीत तपोवन मैदानावर होणार आहे. या कार्यक्रमासाठी 28 हजार 600 हून अधिक लाभार्थी उपस्थित राहणार आहेत. हा कार्यक्रम यशस्वी होण्यासाठी जिल्हा प्रशासनाच्या वतीने चोख नियोजन करण्यात आले आहे.  

 

कार्यक्रमासाठी पालकमंत्री दीपक केसरकर, उच्च व तंत्रशिक्षण मंत्री चंद्रकांत (दादा) पाटील, उद्योग मंत्री उदय सामंत, कामगार मंत्री डॉ. सुरेश खाडे, सार्वजनिक बांधकाम मंत्री रविंद्र चव्हाण, राज्य उत्पादन शुल्क मंत्री शंभूराज देसाई, राज्य नियोजन मंडळाचे कार्यकारी अध्यक्ष राजेश क्षीरसागर, महाराष्ट्र कृषी संशोधन व प्रशिक्षण परिषदेचे उपाध्यक्ष प्रकाश आबिटकर यांच्यासह जिल्ह्यातील लोकप्रतिनिधी व विविध क्षेत्रातील मान्यवर उपस्थित राहणार आहेत.

 

            ‘शासन आपल्या दारी’ कार्यक्रमात सर्व तालुक्यातील लाभार्थ्यांना लाभ देण्यात येणार आहे. या ठिकाणी लाभार्थ्यांना वाटप करण्यासाठी बहुपीक मळणी यंत्र, शेंगा फोडणी यंत्र, डिझेल पंप, स्प्रे पंप, ट्रँम्पोलीन, शिलाई यंत्र, वॉशिंग मशिन, व्हिलचेअर, लेबर सेफ्टी किट, पॉवर टिलर, ट्रक्टर, पॉवर विडर आदी साहित्य ठेवण्यात आले आहे.

 

 याठिकाणी पाणीपुरवठा, फिरते स्वच्छतागृह, रुग्णवाहिका ठेवण्‍यात आल्या आहेत. तसेच लाभार्थी व नागरिकांची गैरसोय होवू नये यासाठी प्रशासनाच्या वतीने योग्य नियोजन करण्यात आले असून कार्यक्रमाची माहिती देणारे बॅनरही विविध ठिकाणी लावण्यात आले आहेत.

00000