कोल्हापूर दि. ७ : महाराष्ट्राचे शिल्पकार आणि माजी मुख्यमंत्री स्व. यशवंतराव चव्हाण यांच्या कृषी औद्योगिक धोरणातून राज्याचा विकास साधण्याचे स्वप्न गोकुळ दुध संघाने आणि आनंदराव पाटील चुयेकर यांनी साकार केले आहे, असे गौरवोद्‌गार त्रिपुराचे राज्यपाल डॉ. डी. वाय. पाटील यांनी आज येथे काढले.
कोल्हापूर जिल्हा सहकारी दूध उत्पादक संघाचे संस्थापक आनंदराव पाटील-चुयेकर यांच्या अमृत महोत्सवाच्या निमित्त आयोजित सत्कार कार्यक्रमात ते बोलत होते. दुध उत्पादक संघाच्या ताराबाई पार्क येथील कार्यालयाच्या आवारात हा कार्यक्रम झाला. प्रमुख पाहुणे म्हणून दुग्धविकास मंत्री मधुकरराव चव्हाण उपस्थित होते. यावेळी सहकार व संसदीय कार्य तथा कोल्हापूरचे पालकमंत्री हर्षवर्धन पाटील, कामगार मंत्री हसन मुश्रीफ, गृह राज्यमंत्री सतेज पाटील आदी प्रमुख उपस्थित होते.
राज्यपाल म्हणाले, कृषी उद्योगाच्या विकासातून राज्याचा विकास साधण्याचे यशवंतराव चव्हाण यांनी धोरण आखले होते. त्यांचे हे धोरण गोकुळने प्रत्यक्षात उतरवून दाखवले. त्यासाठी आनंदराव पाटील यांनी अतिशय परिश्रम घेतले. गोकुळमुळे जिल्ह्यातील अनेक गावांत विकासाची गंगा वाहत आहे.
पालकमंत्री पाटील म्हणाले, गोकुळमुळं महाराष्ट्राचं नाव देशात आणि आंतरराष्ट्रीय स्तरावर गेले. दुग्धव्यवसाय हा समाजातील कोणत्याही स्तरातील व्यक्ती करु शकतो. या व्यवसायामुळं कोल्हापूर जिल्ह्यातील अनेक गावात सामाजिक आणि आर्थिक क्रांती घडली आहे.
दुग्धविकास मंत्री मधुकरराव चव्हाण म्हणाले, गोकुळन शेतकर्‍यांच्या जीवनात क्रांती घडवली आहे. यापुढे गोकुळच्या विकासासाठी सर्वते सहकार्य करु.
कामगार मंत्री हसन मुश्रीफ म्हणाले, गोकुळ आणि आनंदराव पाटील यांनी शेतकर्‍याला केंद्गबिंदू मानून काम केले. म्हणूनच आज गोकुळ आंतरराष्ट्रीय स्तरावर पोहोचला आहे.
गृह राज्यमंत्री सतेज पाटील म्हणाले, आनंदराव पाटील चुयेकर यांच्या सहकारातील अनुभवाचा फायदा शासनाने घ्यायला हवा. त्यांनी सहकार क्षेत्रासाठी केलेले कार्य अतुलनीय आहे.
यावेळी आमदार के. पी. पाटील, आमदार महादेवराव महाडिक यांचीही भाषणे झाली.
यावेळी व्यासपीठावर जिल्हा परिषदेचे अध्यक्ष प्रा. संजय मंडलिक, खासदार जयवंतराव आवळे, आमदार सर्वश्री. सा. रे. पाटील, के. पी. पाटील, चंद्गदीप नरके, सुजित मिणचेकर, महादेवराव महाडिक, चंद्गकांतदादा पाटील, पी. एन. पाटील आदी उपस्थित होते.
यावेळी माजी खासदार उदयसिंहराव गायकवाड, कल्लाप्पाण्णा आवाडे, श्रीमती निवेदिता माने, माजी आमदार संजय घाटगे, गोकुळचे माजी अध्यक्ष अरुण नरके, माजी आमदार नामदेवराव भोईटे, बी. एन. पाटील-मुगळीकर आदी उपस्थित होते.
प्रास्ताविक गोकुळचे अध्यक्ष अरुण डोंगळे यांनी केले. आभार संचालक विश्वास पाटील यांनी मानले.
कोणत्याही टिप्पण्‍या नाहीत:
टिप्पणी पोस्ट करा
टीप: केवळ या ब्लॉगचे सदस्य टिप्पणी पोस्ट करू शकतात.