कोल्हापूर दि. ११ : महाराष्ट्र शासनाच्या उच्च व तंत्रशिक्षण विभागांतर्गत ग्रंथालय संचालनालयाकडून राज्यातील शासनमान्य प्राप्त सार्वजनिक ग्रंथालयांचा गुणात्मक विकास व्हावा, त्यांना अधिक चांगल्या सेवा देण्यासाठी प्रोत्साहन मिळावे या उद्देशाने दरवर्षी उत्कृष्ट ग्रंथालये व ग्रंथालय चळवळीतील उत्कृष्ट कार्यकर्ते व सार्वजनिक ग्रंथालयामधील कर्मचारी यांना शासनातर्फे पुरस्कार देऊन गौरविण्यात येते.
या योजनेतून डॉ. बाबासाहेब आंबेडकर पुरस्कार यांचे नांवे शासनमान्य सार्वजनिक ग्रंथालयांच्या शहरी व ग्रामीण पातळीवरील अ, ब, क, ड वर्गातील प्रत्येकी एक अशा एकूण ८ पुरस्कारासाठी प्राप्त प्रस्तांवातून निवड समितीकडून निवड करण्यात येते. तसेच डॉ. एस. आर. रंगनाथन ग्रंथमित्र पुरस्कार यांचे नांवे ग्रंथालय चळवळीच्या विकासासाठी योगदान देणार्या कार्यकर्त्यांना व सेवाभावी वृत्तीने काम करणार्या उत्कृष्ट सेवकाना प्रोत्साहन मिळावे, या उद्देशाने राज्यस्तरावर प्रत्येकी एकेक व महसूली विभागातून प्रत्येकी एक याप्रमाणे एकूण १४ पुरस्कारासाठी निवड समितीकडून निवड करण्यात येते.
सन २०११-१२ साठी या पुरस्कार योजनेमध्ये सहभागी होऊ इच्छिणार्या शासनमान्य सार्वजनिक ग्रंथालयांनी तसेच ग्रंथालय चळवळीत ज्या कार्यकर्त्यांनी व सेवकांनी किमान १५ वर्षे ग्रंथालयीन सेवेत योगदान दिलेले आहे, अशा पात्र ठरणार्या इच्छुक ग्रंथालये/कार्यकर्ते/ सेवक यांनी आपल्या विभागाच्या सहाय्यक ग्रंथालय संचालक कार्यालयाकडे अर्जांची मागणी करुन व्दिप्रतीत परिपूर्ण प्रस्ताव सहाय्यक ग्रंथालय संचालक कार्यालयाकडे ३० नोव्हेंबर २०११ पूर्वी सादर करावेत.
तसेच विद्यमान वर्षापासून अर्ज करणार्या संस्था, व्यक्ती यांना प्रत्यक्ष भेटी देऊन प्राथमिक तपासणीनंतरच प्रस्ताव अंतिमतः निवड समितीकडे सादर करण्यात येणार आहेत. प्रस्ताव मुदतीत पाठवावेत असे आवाहन ग्रंथालय संचालनालयाचे संचालक दि. श्री. चव्हाण यांनी केले आहे.
कोणत्याही टिप्पण्या नाहीत:
टिप्पणी पोस्ट करा
टीप: केवळ या ब्लॉगचे सदस्य टिप्पणी पोस्ट करू शकतात.