कोल्हापूर महोत्सवाची उत्साहात सांगता

       कोल्हापूर दि. २७ : लखलख चंदेरी या बहारदार कार्यक्रमाने कोल्हापूर महोत्सवाची आज उत्साहात सांगता झाली. कोल्हापूर जिल्हा प्रशासन व कोल्हापूर दसरा महोत्सव ट्रस्ट यांच्यावतीने पाच दिवस सुरु असलेल्या महोत्सवामध्ये लखलख चंदेरी कार्यक्रम कोल्हापूर रसिकांचे खास आकर्षण ठरला. सुरुवातीलाच प्रसिध्द अभिनेत्री अमृता खानविलकर हीने चिकनी चमेली या गीतावर बहारदार नृत्य करीत खचाखच भरलेल्या छ. शिवाजी स्टेडियमवरील रसिक प्रेक्षकांना डोलायला लावले.

         प्रसाद ओक, सतीश तारे यांनी नाट्यमयरिता कार्यक्रमाचे सूत्रसंचलन करीत उपस्थित प्रेक्षकांची भरभरुन दाद मिळविली. महाराष्ट्राचा महागायक अभिजीत कोसंबी, ऋषिकेश रानडे, आनंदी जोशी आदींनी विविध प्रकारची गीते सादर करुन उपस्थितांना मंत्रमुग्ध केले.

        अप्पर जिल्हाधिकारी अप्पासाहेब धुळाज यांनी रसिक प्रेक्षकांनी केलेल्या सहकार्याबद्दल कृतज्ञता व्यक्त केली. जिल्हा पोलीस अधीक्षक विजयसिंह जाधव, उपजिल्हाधिकारी सुभाष बोरकर यांनी झी वाहिनीच्या टीमचे  पुष्पगुच्छ देऊन आभार मानले.

          गेले पाच दिवस सुरु असलेल्या कोल्हापूर महोत्सवामध्ये विविध सांस्कृतिक कार्यक्रमाचे, रांगोळी, छायाचित्र स्पर्धा आदींचे आयोजन करण्यात आले होते. महोत्सवाचे सूत्रसंचलन बी. न्यूजचे कार्यकारी संपादक चारुदत्त जोशी यांनी केले. कोल्हापूर महोत्सव सांगता कार्यक्रमास निवासी उपजिल्हाधिकारी संजय पवार, विविध विभागांचे वरिष्ठ अधिकारी, पर्यटक तसेच रसिक मोठ्या संख्येने उपस्थित होते.