कोल्हापूर दि. २२ : गणेश वंदना, करवीरच्या नावानं चांगभलं हे कोल्हापूर महोत्सवाचं गीत आणि नेत्रदीपक लेसर शो अशा भरगच्च कार्यक्रमाच्या सलामीने आज कोल्हापूर महोत्सवाला प्रारंभ झाला.
येथील छ. शिवाजी स्टेडियमवर आज सायंकाळी कोल्हापूर महोत्सवाचे दीप प्रज्वलन करुन श्रीमंत शाहू महाराज यांच्या हस्ते उद्घाटन झाले. यावेळी कोल्हापूर महानगरपालिकेच्या आयुक्त विजयालक्ष्मी बिदरी-प्रसन्ना, अतिरिक्त जिल्हाधिकारी अप्पासाहेब धुळाज, अप्पर पोलीस अधीक्षक संजय येनपुरे, उपजिल्हाधिकारी सुभाष बोरकर, शिवाजी कादबाने आदी उपस्थित होते.
सायंकाळी पावणेसातच्या सुमारास गणेश वंदनाने कार्यक्रमास सुरुवात झाली. मंजिरी फडणीस यांच्या समूहाने सादर केलेल्या गणेश वंदनाने महोत्सवाची नांदी झाली. त्यानंतर करवीरच्या नावानं चांगभलं हे कोल्हापूर महोत्सवाचं गीत सागर बगाडे यांच्या समूहाने सादर केले.
शिवाजी विद्यापीठाच्या समुहाने महाराष्ट्राची लोकसंस्कृती बॅले सादर करुन महाराष्ट्राच्या सांस्कृतिक परपंरेचा पटच रसिकांसमोर उलगडला.
यावेळी संदीप तावरे, अनुराधा भोसले, दीपक बीडकर, सागर बगाडे, आझाद नायकवडी, संजीव पाटील आदी कलाकारांचा मान्यवरांच्या हस्ते सत्कार करण्यात आला.
कोणत्याही टिप्पण्या नाहीत:
टिप्पणी पोस्ट करा
टीप: केवळ या ब्लॉगचे सदस्य टिप्पणी पोस्ट करू शकतात.