कोल्हापूर दि. २६ : प्रजासत्ताक दिनाचा ६२ वा वर्धापन दिन उत्साहात साजरा करण्यात आला. जिल्ह्याचे पालकमंत्री हर्षवर्धन पाटील यांच्या हस्ते मुख्य शासकीय समारंभात छत्रपती शाहू स्टेडियम येथे ध्वजारोहण करण्यात आले. याप्रसंगी त्यांना मानवंदना देण्यात आली.
येथील छत्रपती शाहू स्टेडियमवर ध्वजारोहणाचा मुख्य शासकीय समारंभ पार पडला. यावेळी प्रा. एन. डी. पाटील, जिल्हाधिकारी लक्ष्मीकांत देशमुख, जिल्हा परिषदेचे मुख्य कार्यकारी अधिकारी डॉ. दिपक म्हैसेकर, विशेष पोलीस महानिरीक्षक तुकाराम चव्हाण, पोलीस अधीक्षक विजयसिंह जाधव, जिल्हा होमगार्ड समादेशक विलास पाटील कौलवकर तसेच स्वातंत्र्यसैनिक, ज्येष्ठ नागरीक, वरिष्ठ शासकीय अधिकारी व शालेय विद्यार्थी या समारंभास मोठ्या संख्येने उपस्थित होते.
मुख्य शासकीय समारंभात पालकमंत्री हर्षवर्धन पाटील यांनी मानवंदना स्वीकारली व संचलनाची पाहणी केली. पोलीस सशस्त्र दल, एनसीसी पथक, महात्मा गांधी तंटामुक्त गाव समिती, पोलीस बँड, श्वान पथक, गृहरक्षक दल, बिनतारी संदेश विभाग, महापालिका अग्निशमन दल, आपत्ती व्यवस्थापन, वनरक्षक दल आदी पथकांनी शानदार संचलन केले.
छ. शाहू विद्यालय, कोल्हापूर पब्लिक स्कूल, राजर्षी शाहू हायस्कूल, नागोजीराव पाटणकर विद्यालयाच्या आरएसपी, गाईड आणि राष्ट्रीय छात्र सेनेच्या पथकांचे संचलन विशेष उल्लेखनीय ठरले. आपत्ती व्यवस्थापनात मदत करणार्‍या व्हाईट आर्मीच्या जवानांनी संचलनात सहभाग घेतला.
पालकमंत्र्यांच्या हस्ते विविध पुरस्कारांचे वितरण
शहीद जवानांच्या कुटुंबियांना पालकमंत्री हर्षवर्धन पाटील यांच्या हस्ते सन्मानित करण्यात आले. वीर पिता-माता श्री. शिवाजी साबळे, सौ. आक्काताई साबळे यांना आर्थिक मदतीचे धनादेश देण्यात आले. अवधूत अशोक गायकवाड व शीलादेवी हिंदुराव लोंढे यांना नेहरु युवा पुरस्कार प्रदान करण्यात आले. गुणवत्तापूर्ण सेवेबद्दल अरविंद रामचंद्ग पाटील (हवालदार, विशेष शाखा), एकनाथ गणपत देसाई (हवालदार, चंदगड पोलीस ठाणे), डॅनियल जॉन बेन (निरीक्षक, पोलीस कल्याण), सूरज दत्तात्रय बेंद्गे (उपनिरीक्षक, शाहूवाडी), श्रीधर बाळकृष्ण राजमाने (उपनिरीक्षक, हातकणंगले) आणि विनायक सुधीर मगर (उपनिरीक्षक, राजारामपुरी) या पोलीस दलातील अधिकारी-कर्मचा-यांचा सन्मान करण्यात आला.
यावेळी न्यू हायस्कूल प्राथमिक मराठी शाखा आणि शा. कृ. पंत वालावलकर हायस्कूलच्या विद्यार्थ्यांनी सादर केलेल्या लेझीमच्या प्रात्यक्षिकांनी सर्वांची लक्ष वेधून घेतले. विद्यार्थ्यांनी सादर केलेल्या या भारतात बंधुभाव नित्य वसू दे आणि बलसागर भारत होवो या देशभक्तीपर गीतांनी स्टेडियमवरील उपस्थित रोमांचित होऊन गेले.
कोणत्याही टिप्पण्‍या नाहीत:
टिप्पणी पोस्ट करा
टीप: केवळ या ब्लॉगचे सदस्य टिप्पणी पोस्ट करू शकतात.