कोल्हापूर जिल्ह्यात पाच ठिकाणी लोक कला यात्रेचे आयोजन

         कोल्हापूर दि. २६ : दक्षिण मध्य क्षेत्र सांस्कृतिक केंद्ग, नागपूर, संस्कृती मंत्रालय, भारत सरकार आणि जिल्हा प्रशासन, कोल्हापूर यांच्या संयुक्त विद्यमाने लोक कला यात्रा दर्शन २०१२ कोल्हापूर येथे आयोजित करण्यात येत आहे. यामध्ये महाराष्ट्र राज्यातील धनगरी गजा, आंध्र प्रदेशातील बोनालु नृत्य, कर्नाटक राज्यातील ढोलु कुनिथा, मध्य प्रदेशातील प्रसिध्द राई नृत्य व छत्तीसगढ राज्यातील पंडवानी गायन अशा पाच राज्यातील लोकनृत्य व लोक संगीताचा एकूण ७० कलावंतांचा समूह कलांचे प्रदर्शन करणार आहे. कोल्हापूर जिल्ह्यातील सांगरुळ, पन्हाळा, कोडोली वारणानगर व कागल येथील रसिक श्रोत्यांसाठी लोक कला यात्रेचा हा कार्यक्रम पाच ठिकाणी ठेवण्यात आला आहे.

      हा कार्यक्रम २७ ते ३१ मार्च २०१२ असा पाच दिवसांचा असून ज्या गावात कार्यक्रम निश्चित केला आहे त्या गावातील मुख्य बाजार पेठेतील रस्त्यावरुन शोभा यात्रा व चौका-चौकात नृत्यांची झलक दाखविण्यात येणार आहे. ही शोभा यात्रा सायं. ५-३० ते ६-३० पर्यंत राहणार असून त्यानंतर सर्व ठिकाणी सायं. ७ ते रात्रौ ९ वाजेपर्यंत खुल्या रंगमंचावर या लोक कला यात्रेचा कार्यक्रम होईल. लोक कला यात्रेच्या कार्यक्रमाचा तपशील पुढीलप्रमाणे आहे. गावाचे नावांपुढे कार्यक्रमाचे स्थान व त्यापुढे कंसात शोभा यात्रा निघण्याचा मार्ग दिला आहे.

      २७ मार्च २०१२ रोजी कोल्हापूर शहर - भवानी मंडप (मुख्य मेन बाजार रोड, कोल्हापूर शहर), २८ मार्च रोजी सांगरुळ - हायस्कूलचा खुला मंच (मुख्य बाजारपेठ चौक), २९ मार्च रोजी पन्हाळागिरी - पन्हाळागिरी नगर परिषद खुले रंगमंच मयुरबाग ( नगर परिषद खुले रंगमंच मयुरबाग), ३० मार्च रोजी कोडोली - वारणा विद्या मंदीर ग्राऊंड, वारणानगर मेन रोड (मुख्य बाजारपेठ रोड) आणि ३१ मार्च २०१२ रोजी कागल - गैबी चौक, खुला रंगमंच (मुख्य बाजारपेठ रोड).

      कोल्हापूर जिल्ह्यातील आयोजित करण्यात आलेल्या लोक कला यात्रेच्या रंगारंग कार्यक्रमास जास्तीत जास्त नागरिकांनी उपस्थित राहून पाच राज्यातील कलांचा आस्वाद घ्यावा असे आवाहन संयोजकांतर्फे करण्यात आले आहे.