आर.टी.ई. अंतर्गत पहिली प्रवेश फेरी सुरू

कोल्हापूर, दि. 17 (जि.मा.का.) : आर.टी.ई. अंतर्गत 25 टक्के विद्यार्थी प्रवेश प्रक्रिया सन 2020-21 अंतर्गत पहिली प्रवेश प्रक्रिया सुरू झाली आहे. 25 टक्के आरक्षण प्रवेश प्रक्रिया महाराष्ट्र शासनाच्या https:// student.maharashtra.gov.in या वेबसाईटवरील RTE Portal या लिंकवर ऑनलाईन पध्दतीने राबविण्यात येत आहे, अशी माहिती शिक्षणाधिकारी आशा उबाळे यांनी दिली.

बालकांचा मोफत व सक्तीच्या शिक्षणाचा हक्क अधिनियम 2009 अन्वये राज्यातील सर्व विना अनुदानित, कायम विना अनुदानित व स्वयंअर्थसहाय्यता तत्त्वावरील प्राथमिक शाळांमध्ये पहिलीच्या वर्गाच्या एकूण विद्यार्थी संख्येपैकी 25 टक्के पर्यंतच्या जागा नजीकच्या परिसरातील वंचित गटाच्या व दुर्बल घटकांतील बालकांच्या प्रवेशासाठी राखून ठेवणे व अशा बालकांना त्यांचे प्राथमिक शिक्षण पूर्ण होईपर्यंत मोफत व सक्तीचे शिक्षण पुरविणे बंधनकारक आहे. या अंतर्गत सदर प्रवेश प्रक्रियेअंतर्गत दि. 12 फेब्रुवारी ते 4 मार्च या कालावधीत पालकांकडून ऑनलाईन प्रवेश अर्ज स्वीकारण्यात आले. यामध्ये जिल्ह्यातील 345 शाळांमधील 3486 जागांसाठी एकूण 2998 पालकांनी ऑनलाईन अर्ज केलेले आहेत. ज्या शाळांना 25 टक्के आरक्षित क्षमतेपेक्षा जादा अर्ज आलेले आहेत. अशा राज्यातील सर्वच शाळांसाठी शिक्षण संचालनालय, पुणे कार्यालयाकडून राज्य स्तरावर दि. 17 मार्च रोजी ऑनलाईन लॉटरी प्रक्रिया घेण्यात येणार आहे. त्याद्वारे NIC सेंटर, पुणे यांचेकडून पहिल्या प्रवेश फेरीसाठी पात्र विद्यार्थ्यांची यादी, तसेच पुढील प्रवेश फे-यांसाठी प्रतिक्षा यादी निश्चित करून RTE पोर्टलवरील होमपेजवर अपलोड करण्यात येणार आहे. प्रथम प्रवेश फेरीसाठी निवडलेल्या पालकांच्या मोबाईलवर शाळेच्या नावासह मेसेज दि. 19 मार्च रोजी दुपारनंतर पाठविण्यात येणार आहेत. मात्र पालकांनी मेसेजवर अवलंबून न राहता RTE पोर्टलवरील Application Wise Details अथवा SELECTED व WAITING LIST या टॅबवर जाऊन आपल्या फॉर्म नंबरद्वारे खात्री करावी. ज्यांचे नाव WAITING LIST मध्ये असेल अशा अर्जांसाठी प्रवेशाची पुढील फेरी काढण्यात येईल. ज्यांची निवड झालेली आहे, त्यांनी पोर्टलवर जाऊन आपला भरलेला फॉर्म USER ID व पासवर्ड टाकून ओपन करावा. त्यामध्ये ADMID CARD या TAB वर क्लिक करून त्याची प्रिंट काढावी. पालकांनी सदरची प्रिंट व प्रवेशासंबंधीची सर्व कागदपत्रे घेऊन शहरी भागासाठी महानगरपालिका व ग्रामीण भागासाठी संबंधित तालुक्याच्या पंचायत समितीतील शिक्षण विभागात जावयाचे आहे. तेथील शाळा पडताळणी समितीकडे आपले ADMIT CARD व प्रवेशासंबंधीची सर्व मूळ कागदपत्रे सादर करून तपासून प्रमाणित करून घ्यावयाची आहेत. पडताळणी समितीकडून प्रवेशपात्र विद्यार्थ्यांना RTE पोर्टलवर ऑनलाईन ADMIT करणेत येईल. विद्यार्थी प्रवेशपात्र असल्याबाबत गटशिक्षणाधिकारी यांच्या स्वाक्षरीचे पत्रासह पालकांनी संबंधित शाळेत जाऊन पाल्याचा प्रवेश निश्चित करावयाचा आहे. पालकांनी शाळा पडताळणी समितीकडून कागदपत्रे न तपासता परस्पर शाळेत गेल्यास पाल्यास प्रवेश दिला जाणार नाही. शाळांनीही पडताळणी समितीने शिफारस केल्याखेरीज कोणत्याही विद्यार्थ्यास RTE च्या 25 टक्के कोटयातून प्रवेश द्यावयाचा नाही. पडताळणी समितीने अपात्र ठरविलेल्या बालकांची निवड रद्द करण्यात येईल.

सध्या नॉव्हेल कोरोना विषाणूचा प्रादुर्भाव लक्षात घेता पालकांनी एकाच वेळेस पडताळणी समितीकडे गर्दी करू नये. तसेच पडताळणी समित्यांनी देखील गर्दी होणार नाही या पध्दतीने RTE प्रवेशाच्या कामकाजाचे नियोजन करावे.

पहिल्या फेरीतील विद्यार्थी प्रवेशाचा कालावधी दि. 19 मार्च रोजी निश्चित करण्यात येईल व त्याची माहिती पडताळणी समितीकडून प्राप्त करून घेता येईल. या कालावधीत संबंधित पालकांनी शाळांमध्ये प्रवेश निश्चित न केल्यास त्यांना पुढील फे-यांमध्ये पुन्हा संधी दिली जाणार नाही. त्यामुळे पालकांनी शाळा प्रवेशाच्या बाबतीत दक्ष राहून विहीत मुदतीत शाळा पडताळणी समितीकडून कागदपत्रे तपासून शाळेमध्ये प्रवेश निश्चित करावा, असे आवाहनही श्रीमती उबाळे यांनी केले आहे.

00000