नोकरी करणाऱ्या महिलांसाठी वसतिगृह सुरु करण्यासाठी संस्थांनी प्रस्ताव सादर करावेत

 

 

कोल्हापूर, दि. 15 (जिमाका) : केंद्र पुरस्कृत नोकरी करणाऱ्या महिलांसाठी वसतिगृह या सुधारीत योजनेस मान्यता देण्यात आली आहे. महिला व बाल विकास विभागाच्या शासन निर्णयानुसार जिल्ह्यात नोकरी करणाऱ्या महिलांसाठी वसतिगृह भाडे तत्वावरील इमारतीमध्ये सुरु करण्यासाठी जिल्हास्तरावर इच्छुक संस्थाकडून प्रस्ताव मागविण्यात येत आहेत. अधिक महितीसाठी जिल्हा महिला व बाल विकास अधिकारी कार्यालय, दुसरा मजला, मध्यवर्ती प्रशासकीय इमारत, कसबा बावडा, कोल्हापूर, दूरध्वनी ०२३१- २६६१७८८ कोल्हापूर येथे संपर्क साधावा, असे आवाहन जिल्हा महिला व बाल विकास अधिकारी श्रीम. शिल्पा पाटील यांनी केले आहे.

केंद्र पुरस्कृत नोकरी करणाऱ्या महिलांसाठी वसतीगृह ही सुधारीत योजना राज्यात केंद्रःराज्यः स्वयंसेवी संस्थेच्यावतीने राबविण्याबाबत महिला व बाल विकास विभागाने शासन निर्णय निर्गमित केला आहे. या शासन निर्णयात योजना राबविणाऱ्या संस्थांसाठी मार्गदर्शक तत्वे व वसतीगृहासाठी अर्थसहाय्य मंजूर करण्यासाठी आवश्यक कागदपत्रे व अटींबाबत तरतूद नमूद आहे.

           या वसतिगृहामध्ये नोकरी करणाऱ्या महिला व प्रशिक्षण घेणाऱ्या किमान ३० ते कमाल १०० प्रवेशितांना प्रवेश दिला जाणार आहे. याकरिता महिला व बाल विकास महामंडळासह राज्य सरकारी एजन्सी, महिला वित्त निगम संस्था / एजन्सी,  शहरी महानगरपालिका आणि कटक मंडळे,  पंचायत राज संस्था, स्वयंसहाय्यता बचत गट, मान्यताप्राप्त महाविद्यालय / विद्यापीठ, महिला कल्याण / सामाजिक कल्याण / महिला शिक्षण क्षेत्रात काम करणाऱ्या धर्मादाय, विश्वस्त, सहकारी नोंदणीकृत संस्था यांना अर्ज सादर करता येणार आहेत.

 

000000