कोल्हापूर, दि. 30 (जि.मा.का.)
: विद्यार्थ्यांच्या छंदाला चालना देण्यासह त्यांना इतिहासाची माहिती करून देण्यासाठी
दीनदयाळ स्पर्श योजना राबविली जात आहे. इयत्ता 6 वी ते 9 वी च्या शालेय विद्यार्थ्यांसाठी
टपाल तिकिट संग्रह खाते योजना सुरू केली आहे. या योजनेत सहभागी
होण्यासाठी 31 ऑगस्टपर्यंत अर्ज करावेत, असे आवाहन वरिष्ठ अधिक्षक ईश्वर पाटील यांनी
केले आहे.
फिलॅटेली एक छंद म्हणून जोपासण्यासाठी
आणि विद्यार्थ्यांच्या अभ्यासाला चालना देण्यासाठी अखिल भारतीय स्तरावर 920 विद्यार्थ्यांना
ही शिष्यवृत्ती देण्यात येणार आहे. प्रत्येक सर्कलव्दारे इयत्ता 6 वी ते 9 वी तील जास्तीत-जास्त
40 विद्यार्थ्यांना प्रतिमाह 600 रूपये च्या दराने प्रतिवर्ष 6 हजार इतकी शिष्यवृत्ती
देण्यात येणार आहे. मान्यताप्राप्त शाळेचा विद्यार्थी असावा. त्याला वार्षिक परीक्षेत
कमीत-कमी 60 टक्के गुण (अजा. व अज. यांना 55 टक्के) असावेत. त्या शाळेचा फिलॅटेली क्लब
असावा. तो विद्यार्थी त्या क्लबचा सदस्य असावा. जर शाळेचा फिलॅटेली क्लब नसेल तर त्या
संबंधित विद्यार्थ्याचे स्वतंत्र टपाल तिकिट संग्रह खाते असावे.
या योजनेत
विद्यार्थ्यांची निवड ही फिलॅटेली प्रकल्प कार्यावरील मुल्यांकनावर किंवा सर्कल ऑफिसकडून
आयोजित प्रश्न मंजुषा स्पर्धेतील कामगिरीवर केली जाईल. सर्कल स्तरावर स्थापन करण्यात
आलेली एक समिती ज्यामध्ये टपाल पदाधिकारी आणि प्रसिध्द फिलॅटेलिस्ट असतील. ज्यांच्याकडून
उमेदवाराने सादर केलेल्या प्रकल्पाच्या कामाचे मूल्यमापन केले जाईल. ज्या विषयावर प्रकल्प
कार्य करायचे आहे त्या विषयाची सूची सर्कल ऑफिसव्दारे अधिसूचना जारी करतेवेळी जाहीर
केली जाईल. निवड झालेल्या विद्यार्थ्यांना आपल्या पालकांसोबत पोस्ट ऑफिस बचत बँक किंवा
इंडिया पोस्ट पेमेंट बँकेचे संयुक्त खाते उघडावे लागेल. प्रत्येक पोस्टल सर्कल पारितोषिकांची
निवड करेल आणि लाभार्थ्यांना शिष्यवृत्तीची रक्कम देण्यासाठी POSB /IPPB ला सूचना देईल.
00000
कोणत्याही टिप्पण्‍या नाहीत:
टिप्पणी पोस्ट करा
टीप: केवळ या ब्लॉगचे सदस्य टिप्पणी पोस्ट करू शकतात.