कोल्हापूर दि. 31 :- आयुष्यमान भारत
- प्रधानमंत्री जनआरोग्य योजनेंतर्गत निवड झालेल्या कोल्हापूर जिल्हयातील लाभार्थ्यांना
पालकमंत्री चंद्रकांत पाटील यांच्या पुढाकाराने कार्ड नोंदणी उपक्रमांतर्गत लाभार्थी कार्ड - गोल्डन कार्ड विनाशुल्य
देण्याचा नाविन्यपूर्ण उपक्रम पालकमंत्री वैद्यकीय सहाय्यता कक्षामार्फत राबविण्यात
येत आहे. आतापर्यंत पाचशेहून अधिक जणांची नोंदणी करण्यात आली आहे. या उपक्रमाचा जिल्हयातील पात्र लाभार्थ्यांनी लाभ घ्यावा, असे आवाहन पालकमंत्र्यांचे
विशेष कार्य अधिकारी बाळासाहेब यादव यांनी केले आहे.
आयुष्यमान भारत : प्रधानमंत्री जनआरोग्य योजनेंतर्गत प्रती कुटुंब आणि प्रती वर्ष पाच लाखापर्यंतचे वैद्यकीय
उपचार मोफत मिळणार आहेत. पालकमंत्री वैद्यकीय सहाय्यता कक्षामार्फत विनाशुल्क देण्यात
येणाऱ्या लाभार्थी कार्ड – गोल्डन कार्ड नोंदणीसाठी शिधा पत्रिका, आधार कार्ड किंवा
पॅन कार्ड किंवा वाहन परवाना आणि प्रधानमंत्री कार्यालयाकडून प्राप्त पत्र ही कागदपत्रे
आवश्यक आहेत.
प्रधानमंत्री जनआरोग्य योजना म्हणजेच आयुष्यमान भारत या योजनेंतर्गत
देशातील 10 कोटीपेक्षा अधिक कुटुंबांना म्हणजेच जवळपास 50 कोटीपेक्षा अधिक लोकसंख्येला
या योजनेचा लाभ होणार आहे. या योजनेमुळे प्रति कुटुंब प्रती वर्ष कमाल मर्यादा 5 लाख
रुपये आहे. लाभार्थ्यांना 5 लाखापर्यंतचे विमा संरक्षण मिळेल, ज्यामध्ये अनेक महत्वाचे
उपचार लोकांना करता येणार आहेत. या योजनेंतर्गत
प्राप्त लाभार्थी विविध गंभीर आजारांवर 1300 उपचार पध्दती पैकी रुग्णालयात योजनेच्या
नियमांनुसार उपलब्ध तज्ञ सुविधांवर आधारित उपचारांचा पूर्णपणे मोफत लाभ मिळेल. तसेच
लाभार्थ्यांना रुग्णालयात प्राप्त होत असलेल्या लाभामध्ये रुग्णालयातील खाटा, सुश्रुषा
व भोजन, एकवेळचा परतीचा प्रवास भत्ता, आवश्यक औषधोपचार व साधन सामुग्री, निदानसेवा,
भूलसेवा व शस्त्रक्रिया यांचा समावेश असेल.
या योजनेसाठी सामाजिक आर्थिक जातीय जनगणना 2011 नुसार विशिष्ट निकषांनुसार
निवडलेले ठराविक निवड लाभार्थी कुटुंबांच्या यादीत नाव असणे आवश्यक आहे. कुटुंबाचे
नाव यादीत आहे किंवा नाही हे शोधण्यासाठी mera.pmjay.gov.in या संकेत स्थळाला भेट द्यावी
अथवा पालकमंत्री वैद्यकीय सहाय्यता कक्ष, कावळा नाका, जुने गेस्ट हाऊस, कोल्हापूर (संपर्क : 9307631325 ) येथे संपर्क
साधावा, असे आवाहनही श्री. यादव यांनी केले
आहे.हा सर्व उपक्रम पालकमंत्री चंद्रकांत पाटील
यांच्या सहकार्याने आणि मार्गदर्शना खाली सुरु असून विशेष कार्य अधिकारी विकास
देशमुख आणि जिल्हा वैद्यकीय कक्षाचे समन्वयक अनिकेत मोरबाळे याचे नियंत्रण करीत
आहेत.
००००००
कोणत्याही टिप्पण्या नाहीत:
टिप्पणी पोस्ट करा
टीप: केवळ या ब्लॉगचे सदस्य टिप्पणी पोस्ट करू शकतात.